Read Papiamento Echonan 11 Bible Online

Echonan 11 - Papiamento bible

Echonan 11

¹E apòstelnan i e rumannan na Hudea a tende ku hende no hudiu tambe a aseptá palabra di Dios.

²Ora Pedro a bai Herusalèm, e kreyentenan ku a risibí sirkunsishon a atak'é

³bis'é: ‘Bo a drenta kas di hende ku no a risibí sirkunsishon i kome ku nan.’

⁴Pedro a tuma palabra i splika nan na plaka chikí loke a pasa:

⁵‘Miéntras mi tabata resa den e siudat Yope, mi a haña un vishon. Algu ku tabata parse un laken grandi tabata bini abou for di shelu; a fir e na su kuater puntanan te ora el a yega serka mi.

⁶Ora mi a wak bon den dje, mi a mira bestia ku kuater pata, bestia feros, bestia ku ta lastra abou na suela i para.

⁷Anto mi a tende un stèm bisa mi: “Ban mira, Pedro, mata bo kome!”

⁸Mi a rospondé: “Di ningun manera, Señor! Nunka nada ku ta indigno òf impuru no a drenta mi boka!”

⁹E stèm a zona pa di dos be for di shelu i kontestá: “Loke Dios a deklará puru, abo no mester konsiderá impuru.”

¹⁰Esaki a sosodé tres be, i despues a hala tur kos bèk den shelu.

¹¹Na mes momento tres hòmber, mandá for di Sesarea pa buska mi, a yega e kas kaminda mi tabata keda.

¹²Spiritu Santu a bisa mi pa mi bai ku nan sin basilá. E seis rumannan akí a kompañá mi pa Sesarea i nos tur a drenta kas di Kornelio.

¹³El a konta nos kon el a mira un angel den su kas, ku a bis'é: “Manda hende Yope bai buska Simon, tambe yamá Pedro.

¹⁴Lo e duna bo un mensahe ku lo sirbi pa abo i henter bo famia haña salbashon.”

¹⁵I ora mi a kuminsá papia, Spiritu Santu a baha riba nan meskos ku El a baha riba nos promé.

¹⁶E ora ei mi a kòrda ku Señor a bisa: “Huan tabata batisá ku awa, ma boso lo ta batisá ku Spiritu Santu.”

¹⁷Si Dios a duna nan pues e mesun don di Spiritu Santu ku El a duna nos, ku ya tabata kere den Señor Hesu-Kristu, ta ken ami ta e ora ei pa kita Dios di hasié?’

¹⁸Ora nan a tende loke el a konta, nan a keda satisfecho i a alabá Dios, bisando: ‘Ke men Dios a duna esnan ku no ta hudiu tambe e oportunidat pa kombertí sigui Dios i haña bida!’

¹⁹E persekushon ku a kuminsá ku morto di Esteban a pone e rumannan hui bai den tur direkshon. Asina nan a yega Fenisia, Chipre i asta Antiokia na Siria; nan tabata prediká e palabra na hudiu so.

²⁰Pero algun di nan, ku tabata bini originalmente di Chipre i Sirene, a bai Antiokia bai prediká e bon notisia tokante Señor Hesus na e no hudiunan tambe.

²¹Señor su poder tabata ku nan, i un kantidat grandi di hende a bini na fe i sigui Señor.

²²E asuntu akí a yega na orea di e iglesia na Herusalèm i nan a manda Barnabas Antiokia.

²³Ora el a yega i mira kon Dios a bendishoná e hendenan, el a bira kontentu i a kurashá nan pa keda fiel i firme den Señor.

²⁴Barnabas tabata un bon hende, ku un fe firme i yená ku Spiritu Santu. Na Antiokia a gana hopi hende pa Señor.

²⁵Barnabas a sigui biaha pa Tarso pa buska Pablo.

²⁶I ora el a hañ'é, el a hib'é Antiokia. Un aña largu nan a reuní ku e iglesia djei i instruí hopi hende. Na Antiokia pa promé bia disipelnan a haña e nòmber ‘kristian’.

²⁷Den e tempu ei profetanan a bini Antiokia for di Herusalèm.

²⁸Un di nan, yamá Agabo, a pronostiká pa medio di Spiritu Santu ku lo bai tin un mizeria di hamber hopi severo rònt mundu. E mizeria di hamber ei a tuma lugá den tempu di emperador Klaudio.[41]

²⁹E disipelnan a disidí di manda yudansa pa e rumannan ku tabata biba na Hudea; kada un a duna segun su forsa.

³⁰Nan a hasi manera nan a kumbiní i manda e sèn pa e ansianonan di iglesia pa medio di Barnabas i Saulo.