Read Papiamento Echonan 2 Bible Online

Echonan 2 - Papiamento bible

Echonan 2

¹Ora fiesta di Pentekòster a yega, tur e siguidónan di Hesus tabata huntu na e mesun lugá.

²Diripiente un zonido manera un bientu fuerte a bini for di shelu i yena henter e kas kaminda nan tabata.

³Algu manera kandela a aparesé: el a parti su mes na lenga ku a bai para riba kada un.

⁴Nan tur a keda yená ku Spiritu Santu i a kuminsá papia na otro lenga, segun Spiritu Santu tabata inspirá nan.

⁵T'asina ku tabatin hudiu deboto fo'i tur parti di mundu ta biba na Herusalèm.

⁶Ora e hendenan a tende e zonido, nan a bòsha bini huntu i a keda sorprendí, pasobra kada ken tabata tende e apòstelnan papia su mes lenga.

⁷Nan a keda babuká, i asombrá nan a bisa:[3] ‘No ta galileo tur e hendenan ei ku ta papia ta?

⁸Ta kon nos kada un por tende nan papia nos mes lenga antó?[4]

⁹Aki tin hende di Partia, Media i Elam, habitantenan di Mesopotamia; hende di Hudea i Kapadosia, di Ponto i Asia,

¹⁰di Frigia i di Pamfilia; tin hende di Egipto i di e regionnan di Libia pegá ku e siudat Sirene; hende for di Roma,

¹¹di Kreta i Arabia; tantu hudiu di nasementu komo esnan ku a bira hudiu. Nos tur aki ta tende nan papia na nos propio lenga tokante e obranan grandi di Dios!’

¹²Nan tur a keda asombrá; nan no tabata sa kiko pensa. Nan tabata puntra otro: ‘Kiko esaki ta nifiká?’

¹³Otronan tabata hasi bofon i bisa: ‘Nan a bebe muchu biña!’

¹⁴E ora ei Pedro a bini dilanti huntu ku e otro diesun apòstelnan i dirigí palabra na nan. El a bisa na bos altu: ‘Hudiunan i boso tur ku ta biba na Herusalèm, t'esaki mi ke bisa boso, skucha bon!

¹⁵E hendenan akí no ta fuma, manera boso ta pensa; ta awor ta nueb'or di mainta.

¹⁶Nò, loke ta sosodé aki ta loke profeta Yoel a bisa:

¹⁷“Den e último dianan, Dios ta bisa, lo Mi drama mi Spiritu riba tur hende. Boso yunan hòmber i muhé lo profetisá; boso hóbennan lo haña vishon i boso hòmbernan di edat avansá lo risibí soño.

¹⁸Sí, riba tur ku ta sirbi Mi, hòmber i muhé, lo Mi drama mi Spiritu den e dianan ei i nan lo profetisá.

¹⁹Lo tin kos maravioso na laria den shelu i señal abou na tera: sanger, kandela i huma diki pretu.

²⁰Solo lo kambia bira skur i luna lo haña koló di sanger, promé ku dia di Señor yega, e dia grandi i glorioso.

²¹I e ora ei tur hende ku invoká nòmber di Señor lo keda salbá!”

²²Israelitanan, skucha mi palabranan! Hesus di Nazarèt a bini serka boso riba enkargo di Dios; esei boso mes por a mira dor di e aktonan poderoso, e milager i señalnan ku Dios a lag'É hasi meimei di boso.

²³Pero ora nan a entreg'É segun e plan i propósito ku Dios tabatin kaba, boso a[5] laga malechornan krusifik'É i mat'É.

²⁴Pero Dios a libr'É for di agonia di morto i lant'É, pasobra morto no por a ten'É bou di su dominio.

²⁵David ta bisa di djE: “Semper mi ta tene Señor mi dilanti, si E ta pará na mi man drechi, mi n' ta hera.

²⁶P'esei mi kurason por ta kontentu, mi boka por kanta di legria. Sí, mi kurpa ta sosegá den speransa,

²⁷ya ku Bo no ta entregá mi na morto, Bo no ta laga bo sirbidó fiel putri den graf.

²⁸Abo a mustra mi e kaminda ku ta hiba na bida; bo presensia lo yena mi ku goso!”

²⁹Rumannan, mi por bisa boso libremente ku nos antepasado David a muri i nan a der'é; su graf ta serka nos te dia djawe.

³⁰Pero pasobra e tabata profeta i tabata sa ku Dios a hur'é ku[6] un di su desendientenan lo a siguié riba su trono,

³¹el a mira den futuro i papia tokante resurekshon di e Mesias, ora el a bisa ku “lo no entreg'é na morto i ku su kurpa lo no putri den graf.”

³²Ta e mesun Hesus akí, Dios a lanta for di morto; nos tur ta testigu di esei.

³³Alsá na man drechi di Dios, El a risibí Spiritu Santu ku Tata a primintí. Awor El a drama e Spiritu Santu ei i t'esei boso ta mira i tende!

³⁴David mes no a subi bai shelu; e mes ta bisa: “Señor Dios a bisa mi Señor: Sinta aki na mi man drechi,

³⁵miéntras Mi ta hasi bo enemigunan un banki pa bo pia sosegá.”

³⁶P'esei henter pueblo di Israel mester tin sigur, ku e mesun Hesus ku boso a krusifiká, Dios a hasi tantu Señor komo Mesias!’

³⁷E palabranan akí a shòk e hendenan i nan a bisa Pedro i e otro apòstelnan: ‘Kiko nos mester hasi antó, rumannan?’

³⁸Pedro a kontestá: ‘Kombertí i laga batisá boso den nòmber di Hesu-Kristu, pa Dios pordoná boso pikánan. I Dios lo duna boso Spiritu Santu.

³⁹E promesa akí ta pa boso, pa boso yunan, i tambe pa tur esnan ku ta leu, esta tur e hendenan ku Señor nos Dios lo yama.’

⁴⁰Ku hopi palabra mas Pedro a testiguá i spièrta nan, bisando: ‘Salba boso di e generashon perverso akí!’

⁴¹Esnan ku a aseptá[7] su palabra a laga nan batisá nan, di manera ku e dia ei mas o ménos tres mil hende a djòin e grupo di disipel.

⁴²Tur e kreyentenan tabata fiel na siñansa di e apòstelnan i na e bida den nan komunidat, i fielmente nan tabata kibra pan i hasi orashon.

⁴³Tur hende tabata yen di rèspèt, pasobra e apòstelnan tabata hasi hopi milager i señal milagroso.[8]

⁴⁴Tur e kreyentenan tabata forma ún komunidat i tabatin tur kos en komun.

⁴⁵Nan tabata bende tur nan propiedat i parti e plaka entre nan segun kada un su nesesidat.

⁴⁶Tur dia nan tabata huntu den tèmpel; nan tabata kibra pan na kas di otro i kome nan kuminda huntu, ku legria i simplesa di kurason.

⁴⁷Nan tabata alabá Dios i tabata bon mirá serka henter pueblo. I tur dia Señor tabata trese mas hende ku a keda salbá, aserka.