Read Papiamento Romanonan 13 Bible Online

Romanonan 13 - Papiamento bible

Romanonan 13

¹Tur hende mester someté nan na esnan ku ta ehersé outoridat, pasobra outoridat ta bini di Dios i esnan eksistente tambe ta Dios a pone.

²Ke men ku esun ku bai kontra e outoridat eksistente ta bai kontra loke Dios mes a instituí. I tur esnan ku ta bai kontra e outoridat akí ta pidi kastigu pa nan kurpa.

³Esun ku ta hasi bon, no mester tin miedu di outoridat, pero esun ku ta hasi malu, sí. Bo no ke tin miedu di outoridat? Wèl, hasi loke ta bon i l'e gaba bo!

⁴Pasobra esnan ku ta ehersé outoridat ta sirbi Dios na bo bienestar. Pero si bo hasi maldat, e ora ei sí tene miedu di dje, pasobra no ta pòrnada outoridat tin poder pa duna kastigu. E ta sirbi Dios pa duna esun ku hasi maldat su kastigu meresí.

⁵P'esei nos mester someté na outoridat, no solamente pa evitá kastigu, sino tambe pasobra ta un asuntu di konsenshi.

⁶Pa e motibu akí tambe boso ta paga belasting, ya ku e funshonarionan ta den sirbishi di Dios i ta dediká nan mes na esei.

⁷P'esei duna kada ken loke e tin derechi riba dje: si ta kontribushon i belasting, pag'é nan; si ta rèspèt i honor, dun'é nan.

⁸No debe niun hende nada. Laga amor ta e úniko kos ku boso debe otro. Pasobra esun ku stima su próhimo ta laga nifikashon berdadero di Lei di Moises sali na kla.

⁹E mandamentunan: ‘No kometé adulterio’, ‘no mata’, ‘no hòrta’, ‘no deseá kos di otro hende’ i tur otro mandamentu ta kai bou di esun mandamentu akí: ‘Stima bo próhimo manera bo ta stima bo mes.’

¹⁰Esun ku ta stima su próhimo no ta hasié daño, p'esei stima otro ta igual na laga e nifikashon berdadero di Lei di Moises sali na kla.

¹¹Den tur esaki, tene kuenta ku e tempu ku nos ta biba aden i sa ku e ora a yega pa boso lanta for di soño. Pasobra awor akí nos salbashon ta mas serka ku tempu nos a kuminsá kere den e bon notisia.

¹²Ta lat den anochi kaba i di dia ta serka di habri; p'esei ban pone tur obra di skuridat un banda i bisti armadura di lus.

¹³Laga nos komportá nos desentemente komo si fuera ta di dia kla. No hiba un bida di paranda i buracheria, inmoralidat seksual i un bida parotin, di pleitamentu i envidia.

¹⁴Pero bisti boso mes ku Señor Hesu-Kristu i stòp di buska pa satisfasé e deseonan malu ku ta bini di boso naturalesa pekaminoso.