Read Papiamento Romanonan 14 Bible Online

Romanonan 14 - Papiamento bible

Romanonan 14

¹Aseptá un hende ku ta débil den fe i no diskutí kuné tokante opinion personal.

²Un ta haña ku e por kome tur kos, miéntras e otro ku ta débil den fe ta kome bèrdura so.

³Esun ku ta kome tur kos no mester menospresiá esun ku no ta kome tur kos. Anto esun ku no ta kome tur kos no mester kondená e otro, pasobra Dios a aseptá esun akí tambe.

⁴Ken bo ta pa husga sirbidó di otro hende? Si e para firme òf kai, ta entre e i su Señor. I lo e para firme, pasobra Señor ta hasi esei posibel!

⁵Tin hende ta haña sierto dia mas importante ku otro dia. Pa otro hende tur dia tin mes balor. Kada ken mester ta konvensí di loke e ta kere!

⁶Esun ku ta balorá sierto dia mas ku otro dia, ta na honor di Señor e ta hasié; esun ku ta kome tur kos, ta na honor di Señor e ta kome, pasobra e ta gradisí Señor pa loke e ta kome. Esun ku no ta kome tur kos, tambe ta hasié na honor di Señor i e tambe ta gradisí Señor.

⁷Niun di nos no ta biba pa su mes i niun di nos no ta muri pa su mes.

⁸Si nos biba, ta pa Señor nos ta biba i si nos muri, ta pa Señor nos ta muri. Ke men, sea ku nos biba òf muri, ta na Señor nos ta pertenesé.

⁹Pasobra Kristu a muri i ta pa reina komo Señor El a bolbe biba, pa reina tantu riba esnan ku a muri komo riba esnan ku ta na bida.

¹⁰Awor abo ku no ta kome tur kos, pakiko bo ta kondená bo ruman? Anto abo ku ta kome tur kos, pakiko bo ta menospresiá bo ruman? Al fin i al kabo nos tur tin ku bai dilanti di Dios pa E husga nos.

¹¹Pasobra tin skibí: ‘Ami Dios bibu, ta hura bo ku tur hende lo hinka rudia pa Mi i proklamá públikamente ku ta Ami ta Dios.’

¹²Ke men ku kada un di nos mester duna kuenta na Dios di su mes echonan!

¹³Awèl, no laga nos sigui kondená otro. Al kontrario, tuma desishon ku bo no ta pone bo ruman trompeká òf kai den piká.

¹⁴Mi sa, sí mi ta konvensí komo hende ku ta uní ku Señor Hesus, ku no tin niun kuminda impuru di su mes. Un kos ta impuru solamente si un hende mes hañ'é impuru!

¹⁵Anto si loke bo ta kome ta ofendé bo ruman, bo no ta trata ku amor. No laga e echo ku bo ta kome sierto kos, hinka e hende ku Kristu a muri p'e den pèrdishon!

¹⁶Ke men, no laga e kos bon ku boso tin haña mal nòmber.

¹⁷Pasobra reino di Dios no ta kuestion di loke hende ta kome i bebe, pero di hiba un bida hustu, di tin pas i goso den Spiritu Santu.

¹⁸Esun ku sirbi Kristu di e forma akí ta agradá Dios i ta keda bon mirá serka hende.

¹⁹P'esei anto nos mester buska ku afan loke ta kontribuí na pas entre ruman i nan kresementu komo komunidat di fe.

²⁰No daña trabou di Dios pa motibu di kuminda! En realidat tur kuminda ta puru, pero ta malu pa kome loke ta un ofensa pa otro hende.[15]

²¹Ta mihó anto pa apstené di karni, biña òf kualke otro kos ku por pone bo ruman trompeká.

²²Laga e fe ku ta pone ku bo por kome tur kos, keda entre abo ku Dios. Felis esun ku su konsenshi no ta remordé, ora e hasi loke ta korekto segun e!

²³Pero si un hende duda ku e por kome algu i e kom'é tòg, e ta kulpabel, pasobra e no ta kome ku e konvikshon ku fe ta duna. I tur loke no ta hasí ku e konvikshon ku fe ta duna, ta piká!