Read Papiamento Romanonan 16 Bible Online

Romanonan 16 - Papiamento bible

Romanonan 16

¹Mi ta rekomendá Febe na boso ku no ta solamente nos ruman, pero tambe diákono den iglesia[17] na Kengrea.

²Risibié bon den nòmber di Señor, manera ruman den fe mester risibí otro; yud'é den tur su nesesidatnan, pasobra el a yuda hopi hende, inkluso mi mes.

³Kumindá Priska i Akila, mi dos kompañeronan den sirbishi di Kristu-Hesus.

⁴Nan a riska nan bida pa mi i no ta ami so ta gradesido na nan, pero tur iglesia no hudiu tambe.

⁵Kumindá e rumannan ku ta reuní komo iglesia na kas di Priska i Akila tambe pa mi. Kumindá mi kerido amigu Epeneto tambe, ku ta e promé persona ku a kombertí kere den Kristu na provinsia di Asia.

⁶Kumindá Maria, ku a traha duru pa boso.

⁷Kumindá mi paisanonan Andróniko i Yunia, ku tabata prezu huntu ku mi. Nan ta apòstel distinguí[18] i a kere den Kristu promé ku mi.

⁸Kumindá Ampliato, mi kerido amigu den Señor.

⁹Kumindá Urbano, nos kompañero den sirbishi di Kristu i mi kerido amigu Stagis.

¹⁰Kumindá Apeles, ku a pasa den hopi prueba i a keda fiel na Kristu i kumindá famia di Aristóbulo.

¹¹Kumindá mi paisano Heródion i henter famia di Narsiso ku ta kere den Señor.

¹²Kumindá Trifena i Trifosa, ku ta traha den sirbishi di Señor i tambe Persis, nos ruman muhé stimá, ku a traha duru pa Señor.

¹³Kumindá Rufo, un kreyente skohí pa hasi un tarea spesial pa Señor i su mama ku ta manera un mama pa mi tambe.

¹⁴Kumindá Asunkrito, Flegon, Hermes, Patrobas, Hermas i tur e otro rumannan ku ta huntu ku nan.

¹⁵Kumindá Filologo i Yulia, Nereus i su ruman muhé Olimpas i tur esnan ku ta huntu ku nan i ku ta pertenesé na e pueblo santu di Dios.

¹⁶Kumindá otro ku un sunchi santu. Tur e iglesianan di Kristu ta manda kumindamentu pa boso.

¹⁷Rumannan, mi ta roga boso pa tene kuidou ku esnan ku ta trese diskordia i ta pone otro hende kai den piká. Loke nan ta hasi ta bai kontra e siñansa risibí. Keda leu for di nan!

¹⁸Pasobra tipo di hende asina no ta sirbi Kristu nos Señor, pero ta nan deseonan baho so nan ta sigui i nan ta kalanchá hende simpel ku palabra dushi pa asina kohe nan kabes abou.

¹⁹Tur hende sa ku boso ta obedesidu, p'esei mi ta kontentu ku boso. Mi ke pa boso ta sabí den loke ta bon i inosente pa loke ta trata maldat.

²⁰Anto pronto e Dios, ku ta duna pas, lo plèchè e atversario bou di boso pia. Grasia di nos Señor Hesus sea ku boso.

²¹Timoteo, mi kompañero di trabou, i mi paisanonan Lusius, Yason i Sosipatro ta manda kumindamentu.

²²Ami Tertio, ku a pone e karta akí riba papel, tambe ta manda kumindamentu den nòmber di Señor.

²³Gaius ta manda kumindamentu. Mi ta hospedá na su kas ku ta na disposishon di henter iglesia. Erastos, e tesorero di siudat, i ruman Quartus tambe ta manda kumindamentu. [

²⁴Grasia di nos Señor Hesu-Kristu sea ku boso tur. Amèn.]

²⁵Alabá sea Dios ku por fortalesé boso segun e bon notisia ku mi ta anunsiá tokante Hesu-Kristu. E mensahe ta kuadra ku loke Dios a revelá[19] di su plan ku pa siglo El a tene skondí.

²⁶Pero awor Dios a revelá e plan skondí ei pa medio di Skritura di e profetanan, skibí segun mandato di e Dios eterno. E plan ei a keda revelá pa tur nashon kere i obedesé Dios.

²⁷Na e úniko Dios, ku tin tur sabiduria, sea gloria pa medio di Hesu-Kristu den tur eternidat! Amèn.