Read Papiamento Romanonan 3 Bible Online

Romanonan 3 - Papiamento bible

Romanonan 3

¹P'esei ta ki bentaha tin di ta hudiu òf di ta sirkunsidá?

²Hopi bentaha, anto den diferente forma! Pa kuminsá, Dios a konfia su palabra na nan,

³pero algun di nan no tabata fiel n'E! Akaso esei ke men ku Dios ta stòp di ta fiel na nan?

⁴Apsolutamente ku nò! Dios semper ta honesto, ounke hende sí ta gaña. Manera Skritura ta bisa: Mester sali na kla ku loke Abo, Dios, bisa ta hustu; ora Bo ta dilanti di korte, lo Bo gana bo kaso!

⁵Pero ke tal si ta nos maldat ta sirbi pa mustra ku Dios ta hustu? Ora E kastigá nos pa nos maldat, nos lo bisa e ora ei ku Dios ta inhustu? — Klaro ku awor akí mi ta papia for di punto di bista humano. —

⁶Apsolutamente ku nò! Si Dios ta inhustu, kon E por husga mundu?

⁷Awor si mi gañamentu ta sirbi pa bèrdat di Dios resultá mas glorioso, pakiko ta husga mi komo pekadó antó?

⁸Si ta asina, no ta mihó hasi maldat pa algu bon sali fo'i dje? Algun hende ku ta gaña riba nos ta bisa ku ta hustamente e pensamentu ei mi ta proklamá; e hendenan ei meresé kastigu.

⁹Kiko antó? Akaso nos komo hudiu tin privilegio riba otro hende ora Dios ta husga? Sigur ku nò![4] Pasobra ya mi a mustra kaba ku tur tur hende, tantu hudiu komo no hudiu, ta den gara di piká.

¹⁰Manera tin skibí den Skritura: No tin niun ku ta hasi bon, ni sikiera ún!

¹¹No tin niun ku komprondementu; niun ku ta buska Dios.

¹²Pero tur a kohe mal kaminda, perverso tur pareu. Ningun no ta hasi bon, ni sikiera ún!

¹³Nan garganta ta manera un graf habrí; nan lenga nan ta usa pa mentira; tras di nan lep tin venenu di víbora.

¹⁴Nan boka ta yená ku maldishon i amargura;

¹⁵nan ta ansioso pa drama sanger inosente.

¹⁶Unda ku nan bira nan ta sembra ruina i destrukshon

¹⁷i nan no konosé kaminda di pas.

¹⁸Nan no tin rèspèt pa Dios.

¹⁹Nos sa ku tur loke Lei ta siña ta konta pa esnan ku ta biba bou di Lei, esta e hudiunan. Ke men antó ku tur hende tin ku keda boka ketu i henter mundu, tantu hudiu komo no hudiu, mester duna Dios kuenta i rason.

²⁰Pasobra Dios no ta aseptá niun hende komo hustu, pa motibu ku e ta kumpli ku lei. Lei ta sirbi pa hasi nos konsiente ku nos ta pekadó.

²¹Pero awor Dios a mustra na ki manera, esta sin Lei di Moises, E ta aseptá hende komo hustu. Esei ta algu ku Lei i e profetanan mes ta konfirmá:

²²Dios ta aseptá tur hende pa medio di fe den Hesu-Kristu. Esei ta konta pa tur hende ku kere den Kristu, sin distinshon.

²³Tur hende a peka i ta karesé di Dios su gloria.

²⁴Pero den su bondat Dios ta aseptá hende sin niun mérito di nan parti, dor di laga Kristu-Hesus libra nan di nan pikánan.

²⁵Dios a hasi Kristu instrumento di pordon dor di lag'É drama su sanger. I e pordon ei nos ta alkansá pa medio di fe. Di e forma akí Dios ker a mustra kon hustu E ta dor di pordoná nos pikánan di ántes,[5]

²⁶pasobra E ta tolerante. Pero den e tempu akí Dios ker a demostrá, ku E ta hustu i ta aseptá hende ku ta kere den Kristu komo hustu.

²⁷Unda antó orguyo di hende a keda dilanti di Dios? El a keda eliminá! Pakiko? Pasobra nos ta kumpli ku Lei? Nò, pasobra ta fe ta konta!

²⁸Pues nos a konkluí kaba ku ta Dios ta aseptá hende komo hustu pa medio di fe i no pasobra hende ta kumpli ku Lei di Moises.

²⁹Akaso Dios ta Dios di e hudiunan ku tin Lei so? E no ta Dios di esnan no hudiu tambe? Sí, klaro ku E ta nan Dios tambe,

³⁰ya ku ta un Dios so tin! E ta aseptá tantu hudiu, ku nan sirkunsishon, komo esnan no hudiu, sin sirkunsishon, djis pa motibu di nan fe.

³¹Ke men anto ku nos ta pone Lei di Moises un banda pa motibu di fe? Klaro ku nò! Al kontrario, nos ta duna Lei su berdadero balor.