Read Papiamento Romanonan 5 Bible Online

Romanonan 5 - Papiamento bible

Romanonan 5

¹Awor ku Dios a aseptá nos komo hustu pa medio di fe, nos tin pas ku Dios, pa medio di nos Señor Hesu-Kristu.

²Hesu-Kristu a duna nos akseso na grasia di Dios ku nos a aseptá ku fe i ku ta duna firmesa na nos bida, i nos ta broma ku e speransa di tuma parti na e gloria ku Dios lo duna.

³Anto esei no ta tur kos, nos ta broma tambe den nos sufrimentu, pasobra nos sa ku sufrimentu ta duna nos kapasidat pa perseverá.

⁴Perseveransia ta hasi nos hende ku un karakter aprobá pa Dios; esei na su turno ta yena nos ku speransa.

⁵Anto e speransa ei no ta defroudá nos, pasobra Dios a drama su amor den nos kurason pa medio di Spiritu Santu ku El a duna nos.

⁶Nèt na momento ku nos no por a yuda nos kurpa, Kristu a muri pa hende ku no ta tene kuenta ku Dios.

⁷Awor no ta fásil haña un hende dispuesto pa muri pa un hende hustu, ounke un hende lo por entregá su bida pa un otro hende ku a hasi un gran bondat p'e.[6]

⁸Dios sí ta demostrá su amor pa nos dor ku Kristu a muri pa nos miéntras nos tabata pekadó ainda.

⁹P'esei awor ku Dios a aseptá nos komo hustu pa motibu ku Hesus a drama su sanger pa nos, ku muchu mas rason nos lo skapa e kastigu di Dios pa medio di Hesus.

¹⁰Pasobra si Dios a rekonsiliá nos kunÉ tempu nos tabata su enemigu ainda, pa medio di morto di su Yu, ku mas rason lo E salba nos pa medio di bida di su Yu, awor ku nos ta rekonsiliá kunÉ.

¹¹Anto esei no ta tur kos, awor nos por broma ku Dios, danki na nos Señor Hesu-Kristu ku a rekonsiliá nos ku Dios.

¹²Pues, piká a drenta mundu via un solo hende i pa via di piká a bini morto. Di e manera ei piká a plama entre tur hende, pasobra tur tur hende a hasi piká.

¹³Promé ku Lei di Moises ya tabatin piká den mundu, pero no por a tuma piká legalmente na kuenta sin Lei.

¹⁴Sinembargo for di tempu di Adam te Moises, morto a reina asta riba hende ku no a hasi e mesun piká ku Adam, esta ku no a violá un mandamentu spesífiko di Dios. Awor ta asina ku Adam tabata modelo di Esun ku mester a bini.

¹⁵Sinembargo no por kompará piká di Adam ku grasia di Dios. Hopi hende a muri pa via di piká di un hende so, pero e don ku Dios a duna nos gratuitamente pa medio di Esun otro, Hesu-Kristu, ta muchu mas grandi i na bienestar di hopi hende.

¹⁶Tin un diferensia entre e don di Dios i e piká di esun hende Adam, pasobra despues di e piká di Adam a sigui un huisio ku a resultá den kondenashon, pero despues di e pikánan di tantísimo otro hende a sigui un don di Dios i e don ei tabata pordon kompleto.

¹⁷A konsekuensia di kaida di un solo hende, morto a kuminsá reina den mundu. Pero kuantu mas Esun hende Hesu-Kristu no a logra! Pasobra pa medio di djE tur hende lo biba, tur hende ku Dios pa puru bondat i abundantemente a duna e regalo di ta aseptá pa Dios.

¹⁸Asina antó, meskos ku piká di ún hende ta hiba na kondenashon, asina obediensia di Esun otro ei ta hasi ku Dios ta deklará tur hende hustu i nan ta haña bida komo resultado.

¹⁹Pasobra, meskos ku hopi hende a bira pekadó komo resultado di desobediensia di un solo hende, asina Dios ta aseptá tur hende komo hustu pa medio di obediensia di e otro hende, Hesu-Kristu.

²⁰A introdusí Lei pa piká oumentá, pero ora piká a oumentá Dios a mustra su grasia muchu mas tantu.

²¹Ke men anto, meskos ku piká a reina dor di trese morto, asin'ei grasia di Dios lo reina dor ku Dios ta aseptá hende pa medio di nos Señor Hesu-Kristu, pa duna nan bida eterno.