Read Papiamento 1 Korintionan 1 Bible Online

1 Korintionan 1 - Papiamento bible

1 Korintionan 1

¹Esaki ta karta di Pablo, ku Dios a disidí di yama pa ta apòstel di Kristu-Hesus, i di nos ruman Sostenes

²na e iglesia di Dios na Korinte, na tur esnan yamá pa ta Dios su pueblo santu, na esnan ku ta pertenesé n'E den union ku Kristu-Hesus. E karta akí ta dirigí tambe na tur esnan ku tur kaminda ta invoká nòmber di nos Señor Hesu-Kristu, ku ta nan Señor i nos Señor.

³Dios, nos Tata, i Señor Hesu-Kristu duna boso grasia i pas.

⁴Semper mi ta yama Dios danki pa e grasia ku El a duna boso pa medio di Kristu-Hesus.

⁵Pasobra pa medio di djE Dios a hasi boso riku den tur sentido, tantu ku don di palabra komo ku don di konosementu,

⁶di manera ku e mensahe tokante Kristu a keda fuertemente establesé den boso bida.

⁷Miéntras ku boso ta warda ansiosamente riba e momento ku nos Señor Hesu-Kristu aparesé, boso no falta niun don spiritual.

⁸Lo E laga boso keda firme pará te na final, ya asina boso por ta liber di tur reproche riba e dia ku nos Señor Hesu-Kristu bini bèk.

⁹Dios ta fiel, E ku a yama boso pa biba den komunion ku su Yu, nos Señor Hesu-Kristu.

¹⁰Den nòmber di nos Señor Hesu-Kristu, rumannan, mi ta apelá na boso, pa boso ta di akuerdo ku otro. No pèrmití divishon entre boso, ma sea kompletamente ún di mente, di mesun konvikshon.

¹¹Pasobra Kloe su hendenan a informá mi ku boso ta pleita ku otro.

¹²Loke mi ke men ta lo siguiente: tin algun di boso ta bisa: ‘Ami ta di Pablo!’, otro ta bisa: ‘Ami di Apolo!’, algun otro: ‘Ami ta di Kefas!’ i otronan ta bisa: ‘Ami ta di Kristu!’

¹³Ke men a parti Kristu na pida pida anto? Ta Pablo a muri pa boso na krus? Ta den nòmber di Pablo a batisá boso?

¹⁴Mi ta yama Dios danki ku ta Krispo i Gaius so mi a batisá.

¹⁵Ke men niun hende no por bisa ku boso a risibí boutismo den mi nòmber!

¹⁶Sí, mi a batisá Stefanas i su hendenan di kas tambe, ma mi no ta kòrda ku mi a batisá niun otro hende mas!

¹⁷Pasobra Kristu no a manda mi pa mi batisá hende, ma pa prediká e bon notisia, sin usa sabiduria humano ku su papiá bunita, pa Kristu su morto riba krus no pèrdè poder.

¹⁸Pasobra e mensahe tokante Kristu su morto na krus ta kos di loko pa esnan ku ta bai pèrdí, ma pa nos ku ta keda salbá, e ta poder di Dios!

¹⁹Skritura ta bisa ku Dios a bisa: ‘Lo mi kaba ku sabiduria di e sabionan i pone inteligensia di e inteligentenan un banda.’

²⁰Awor unda e sabio, e dòktor di lei òf e filósofo di e mundu akí a keda? Akaso Dios no a mustra ku sabiduria di e mundu akí ta lokura?

²¹Sí, Dios den su sabiduria a disponé ku hende no ta siña konosé Dios pa medio di sabiduria humano. P'esei El a disidí di usa nos mensahe, ku hende ta haña ta kos di loko, pa salba esnan ku ta kere.

²²E hudiunan ke mira señal milagroso, e griegonan ta kore tras di sabiduria,

²³ma nos ta prediká e Mesias krusifiká. Pa e hudiunan esei ta un mensahe ofensivo, pa esnan no hudiu e ta kos di loko.

²⁴Ma pa esnan ku Dios a yama, sea hudiu òf no hudiu, e Mesias ei ta poder i sabiduria di Dios!

²⁵Pasobra loke ta parse lokura di Dios, ta mas sabí ku sabiduria di hende. Loke ta parse debilidat di Dios, ta mas fuerte ku forsa di hende.

²⁶Rumannan, kòrda ken boso tabata dia Dios a yama boso. For di punto di bista humano poko di boso tabata sabí, poderoso òf di bon famia.

²⁷Ma Dios a skohe loke mundu ta konsiderá lokura pa bergonsá e sabionan. El a skohe loke mundu ta konsiderá di ta débil pa bergonsá esnan poderoso.

²⁸El a skohe loke mundu ta konsiderá inferior i ta menospresiá. Sí, el a skohe loke no ta nada pa kaba ku loke ta importante.

²⁹Ke men, niun hende no por broma dilanti di Dios.

³⁰Pero pa medio di Dios boso ta den Kristu, kende a bira nos sabiduria, nos hustisia, santidat i liberashon.

³¹P'esei anto, manera Skritura ta bisa: ‘Laga esun ku ke broma, broma ku Señor!’