Read Papiamento 1 Korintionan 11 Bible Online

1 Korintionan 11 - Papiamento bible

1 Korintionan 11

¹Sigui mi ehèmpel, meskos ku mi ta sigui ehèmpel di Kristu.

²Mi ta felisitá boso, pasobra semper boso ta kòrda riba mi i boso ta sigui e siñansa, manera mi a pas'é pa boso.

³Pero mi ke pa boso komprondé ku Kristu ta na kabes di kada hende hòmber, ku hòmber ta na kabes di hende muhé i ku Dios ta na kabes di Kristu.

⁴Si un hòmber tapa su kabes, ora e ta resa òf profetisá, e ta pone kara di esun ku ta su kabes na bèrgwensa.

⁵Pero un muhé ta pone kara di esun ku ta su kabes na bèrgwensa, si e no tapa su kabes ora e ta profetisá.

⁶Pasobra si un hende muhé no tapa su kabes, lag'é feit'é antó! Pero si e ta haña ku kòrta kabei òf feita su kabes ta algu bergonsoso, lag'é tap'é antó!

⁷Hende hòmber sí no mester tapa su kabes, pasobra e ta imágen di Dios i ta reflehá gloria di Dios. Pero hende muhé ta reflehá gloria di hòmber.

⁸Pasobra Dios no a krea hòmber for di muhé, pero muhé sí El a krea for di hòmber.

⁹Ni no a krea hòmber pa muhé, pero muhé sí pa hòmber.

¹⁰P'esei mes un hende muhé mester pone algu riba su kabes ora e ta resa, komo señal di su mes outoridat,[6] pa motibu di e angelnan.

¹¹Sinembargo den nos relashon ku Señor, ni muhé ni hòmber no por sin otro.

¹²Pasobra ounke ta bèrdat ku a krea muhé for di hòmber, na su turno hende hòmber a nase for di un hende muhé i Dios ta orígen di tur kos.

¹³Husga pa boso mes: ta bon pa hende muhé resa sin algu pa tapa su kabes?

¹⁴Naturalesa mes ta mustra ku ta un bèrgwensa pa hende hòmber laga su kabei krese bira largu.

¹⁵Pero pa un hende muhé laga su kabei krese bira largu ta un honor, pasobra el a haña kabei largu pa tapa su kabes.

¹⁶Pero si tin hende ku ke drenta diskushon riba e tópiko akí, ta bon pa sa ku ni nos ni e iglesianan di Dios no konosé otro kustumber.

¹⁷Pa loke ta trata e siguiente instrukshonnan, mi no por felisitá boso, pasobra boso enkuentronan ta hasi mas daño ku bon.

¹⁸Na promé lugá, mi a tende ku ora boso bini huntu komo iglesia, tin divishon entre boso i mi ta kere ku tin algu di bèrdat den esei.

¹⁹Bon mirá mester tin divishon entre boso pa sali na kla ken ta kreyente berdadero.

²⁰Resultado di e divishonnan akí ta ku no ta sena di Señor boso ta kome, ora boso ta reuní!

²¹Pasobra ora di kome tur hende ta kore kome nan kuminda. Anto algun ta pasa hamber, miéntras otro ta bebe bira burachi!

²²Boso tin boso mes kas kaminda boso por kome i bebe tòg? Pakiko menospresiá iglesia di Dios i pone kara di esnan ku no tin nada na bèrgwensa? Kiko boso ta ferwagt ku mi ta bisa boso awor? Pabien? Klaro ku nò!

²³Pasobra ami a risibí e siñansa akí ku Señor a laga atras i mi a pas'é pa boso. Esta ku riba e anochi ku nan a traishoná Señor Hesus, El a kohe pan,

²⁴yama Dios danki, kibr'é i bisa: ‘Esaki ta mi kurpa; e ta pa boso. Hasi esaki pa boso kòrda riba Mi.’

²⁵Di mesun forma, El kohe e kopa despues di sena i bisa: ‘Esaki ta e kopa di e aliansa nobo konfirmá ku mi sanger. Kada be ku boso bebe for di dje, hasié pa boso kòrda riba Mi.’

²⁶Kada be ku boso kome for di e pan akí i bebe for di e kopa akí, boso ta proklamá morto di Señor te ora E bolbe bini.

²⁷Ke men, ken ku kome for di e pan òf bebe for di e kopa di Señor na un manera ku ta deshonrá Señor, ta kulpabel: e ta hasi piká kontra kurpa i sanger di Señor.

²⁸P'esei tur hende mester saminá su mes promé ku e kome for di e pan i bebe for di e kopa.

²⁹Pasobra si e mester di kome i bebe sin ku e paga tinu ku ta trata di kurpa di Señor, e ta yama kastigu riba e mes dor di kome i bebe.

³⁰P'esei mes hopi di boso ta malu i débil i tin algun a fayesé!

³¹Si nos lo a saminá nos mes bon, Señor lo no a kastigá nos.

³²Pero awor E ta kastigá i koregí nos pa E no kondená nos huntu ku esnan ku ta pertenesé na e mundu akí.

³³P'esei anto, mi rumannan, ora boso bini huntu pa kome, warda riba otro!

³⁴Si tin hende ku tin hamber, mihó nan kome na nan mes kas, pa Dios no tin nodi di kastigá boso, ora boso bini huntu. Mi ta atendé e otro asuntunan, ora mi bini serka boso.