Read Papiamento 1 Korintionan 15 Bible Online

1 Korintionan 15 - Papiamento bible

1 Korintionan 15

¹Awor, rumannan, mi ke pa boso kòrda e bon notisia ku mi a prediká na boso. Ta e bon notisia ei boso a aseptá i ta riba dje boso ta firme pará.

²I ta pa medio di e bon notisia ei boso lo haña salbashon, basta boso tene duru na e mensahe manera ami a predik'é na boso. Sino ta enbano boso a bini na fe.

³Na promé lugá mi a pasa e siñansa ku mi a risibí na boso, esta ku Kristu a muri pa nos pikánan, manera Skritura ta bisa;

⁴ku nan a der'É i ku riba e di tres dia El a lanta for di morto, manera Skritura ta bisa;

⁵ku El a aparesé na Kefas i despues na e diesdos apòstelnan.

⁶Despues El a aparesé na mas ku 500 ruman pareu; algun di nan a muri, pero mayoria di nan ta na bida ainda.

⁷Despues El a aparesé na Hakobo, mas despues na tur e apòstelnan.

⁸I pa último El a aparesé na ami, esun misbá.

⁹Pasobra mi ta esun delaster den e apòstelnan i ni sikiera mi no ta meresé mes di ta yamá apòstel, ya ku mi a persiguí iglesia di Dios.

¹⁰Pero danki na grasia di Dios mi ta e hende ku mi ta. E no a mustra mi su bondat enbano; al kontrario, mi a traha mas duru ku nan tur; no ami mes, pero Dios ku den su bondat a yuda mi.

¹¹En todo kaso, sea t'ami òf ta nan, ta esaki ta loke nos ta prediká i ta esaki boso a kere.

¹²Awor, si nos ta prediká ku Kristu a lanta for di morto, kon por ta ku tin di boso ta bisa ku no tin lantamentu for di morto?

¹³Si no tin lantamentu for di morto, Kristu lo no por a lanta for di morto.

¹⁴Anto si Kristu no a lanta for di morto, tantu loke nos ta prediká komo boso fe ta sin sentido.

¹⁵Anto pió ainda, esei ta prueba ku nos ta gaña riba Dios, ya ku nos a lanta falsu testimonio kontra djE, ora nos a bisa ku El a lanta Kristu for di morto. Si ta bèrdat ku morto no ta lanta, e ora ei ke men ku Dios no a lanta Kristu fo'i morto tampoko!

¹⁶Pasobra si morto no ta lanta for di morto, Kristu tampoko no a lanta for di morto.

¹⁷Anto si Kristu no a lanta for di morto, boso fe no ta bal nada i boso ta ketu bai bou di dominio di piká.

¹⁸Esei lo ke men tambe ku esnan ku a kere den Kristu i a muri, a bai pèrdí.

¹⁹Si nos konfiansa den Kristu ta konta solamente pa e bida akí, nos ta e hendenan di mas mizerabel riba mundu.

²⁰Pero en realidat Kristu a lanta fo'i morto komo Esun promé di e mortonan.

²¹Pasobra meskos ku morto a drenta mundu pa medio di un hende, resurekshon for di morto tambe ta bini pa medio di un hende.

²²Meskos ku tur hende mester muri pa motibu di nan relashon ku Adam, asina tur hende lo lanta for di morto pa motibu di nan union ku Kristu.

²³Pero kada un ta lanta for di morto na su turno: promé Kristu i despues, ora E bini bèk, esnan ku ta pertenesé n'E.

²⁴Anto e ora ei e fin lo yega; Kristu lo destruí tur outoridat, tur poder i tur potensia spiritual i entregá e reino na Dios Tata.

²⁵Pasobra Kristu mester reina te ora tur su enemigunan ta bou di su pia.

²⁶Anto morto ta e último enemigu ku lo keda derotá,

²⁷pasobra Skritura ta bisa: ‘Dios a buta tur kos bou di su pia.’ Klaro ku Esun ku ta pone tur kos bou di Kristu su pia no ta inkluí den e ‘tur kos’ ei!

²⁸Ora tur kos ta someté na Kristu, e Yu mes lo someté su mes na Dios, ku a someté tur kos n'E i asina Dios lo ta supremo riba tur kos i den tur kos.

²⁹Anto ke tal di esnan ku ta laga batisá nan mes pa esnan ku a muri kaba? Ta ki nodi tin pa nan hasié, si enberdat defuntu no ta lanta fo'i morto?

³⁰Anto ke tal di nos mes? Si no tin lantamentu fo'i morto, ta pakiko nos ta kore peliger konstantemente asina?

³¹Mi rumannan, tur dia mi ta enfrentá morto. Esei ta sigur, mes sigur ku mi ta orguyoso di loke Kristu-Hesus, nos Señor, a hasi den boso.

³²Kiko mi ta gana anto si mi a lucha na manera di papia kontra bestia feros na Éfese djis pa interes pasahero? Ma si ta bèrdat ku defuntu no ta lanta for di morto, ‘ban kome i bebe, pasobra mañan nos no t'ei mas!’

³³No gaña boso mes: ‘Esun ku hunga ku lodo, ta susha su man!’[7]

³⁴Bin bei i stòp di peka, pasobra algun di boso no konosé Dios. Mi ta bisa boso esaki pa pone boso kara na bèrgwensa.

³⁵Pero hende lo por puntra: ‘Kon e defuntunan lo lanta for di morto? Ki sorto di kurpa nan lo tin?’

³⁶Hende bobo! Ora bo sembra un simia den tera, e simia no por spreit si e no muri promé!

³⁷Ora bo sembra, no ta e mata ku ta bai sali bo ta sembra, pero simia so, sea e ta di trigo òf kualke otro kos.

³⁸Despues Dios ta duna e simia e aparensia ku E ke; kada sorto di simia ta haña su mes aparensia komo mata.

³⁹No ta tur aparensia ta meskos: tin diferensia entre kurpa di hende, kurpa di bestia, kurpa di para i kurpa di piská.

⁴⁰Tin kurpa selestial i kurpa terenal, pero e splendor di esun selestial ta otro for di esun terenal.

⁴¹Solo no ta bria manera luna òf strea i asta entre e streanan tin diferensia den splendor.

⁴²Asina ta sosodé ku lantamentu for di morto: Loke dera ta pasa bai i loke lanta for di morto ta algu inkoruptibel.

⁴³Loke dera ta despresiabel i loke lanta for di morto ta glorioso; loke hende dera ta suak i loke lanta for di morto ta fuerte.

⁴⁴Ta dera un kurpa mortal i un kurpa spiritual ta lanta for di morto. Pues si ta eksistí un kurpa mortal, tambe ta eksistí un kurpa spiritual.

⁴⁵Asin'akí Skritura ta bisa: ‘E promé hende, Adam, a bira un hende ku bida,’ pero e último Adam a bira un spiritu ku ta duna bida!

⁴⁶Sinembargo no ta loke ta spiritual a eksistí promé, pero loke ta mortal. Loke ta spiritual a bini despues.

⁴⁷E promé hende, trahá di tera, a bini di tera, pero e di dos hende a bini di shelu.

⁴⁸Hende mortal ta manera e hende trahá di tera; hende selestial lo ta manera e hende ku a bini di shelu.

⁴⁹Awor, meskos ku nos parse e hende trahá di tera, asina nos lo parse esun ku a bini di shelu!

⁵⁰Laga mi bisa boso un kos: loke ta puramente físiko, no por haña parti den reino di Dios: loke ta pasa bai, no por toka parti na loke ta inkoruptibel.

⁵¹Pero mi ke konta boso un sekreto revelá pa Dios: no ta nos tur ta muri, pero nos tur lo transformá sí,

⁵²diripiente, den un fregá di wowo, ora e último tròmpèt zona. Pasobra tròmpèt lo zona i e defuntunan lo lanta for di morto pa no bolbe muri nunka mas i nos lo keda transformá.

⁵³Pues nos naturalesa ku ta pasa bai, ta transformá bira unu ku ta permanesé pa semper i nos kurpa mortal lo bira inmortal!

⁵⁴I ora nos naturalesa ku ta pasa bai transformá bira un ku ta permanesé pa semper i nos kurpa mortal bira inmortal, e ora ei loke ta skibí den Skritura lo keda kumplí: ‘A mata Lamuèrtè; viktoria ta kompleto!

⁵⁵Lamuèrtè, unda bo viktoria a keda? Unda bo bion ta?’

⁵⁶Piká ta e bion ku ta duna Morto forsa pa mata i Lei ta duna piká forsa!

⁵⁷Ma laga nos gradisí Dios ku ta duna nos viktoria pa medio di nos Señor Hesu-Kristu!

⁵⁸P'esei anto, rumannan stimá, para firme sin tambaliá, mira pa boso destaká semper den boso trabou pa Señor, pasobra boso sa ku e trabou ku boso ta hasi den union ku Señor, no ta enbano.