Read Papiamento 1 Korintionan 6 Bible Online

1 Korintionan 6 - Papiamento bible

1 Korintionan 6

¹Kon por ta ku tin di boso ku ta akudí na hues ku no ta kreyente, na lugá di akudí na e pueblo santu, ora nan tin un kaso kontra un otro ruman?

²Akaso boso no sa ku e pueblo santu lo husga mundu? Anto si boso ta bai husga mundu, kon por ta ku boso no ta kapasitá pa regla kaso insignifikante?

³Boso no sa ku ta nos lo husga e angelnan? Awor ku kuantu mas rason nos lo no por husga e kosnan di e bida akí?

⁴Awor ora boso tin ku husga kaso di bida diario, pakiko boso ta laga no kreyente para pa hues antó? Ta hende ku no tin nada di bisa den iglesia.

⁵Esta bèrgwensa! No tin niun hende ku sabiduria pa regla un desakuerdo entre ruman?

⁶Pero nò, ta ruman kristian ta hiba otro ruman dilanti di korte pa laga hende no kreyente disidí riba e asuntu!

⁷E solo echo ku boso ta envolví den kaso hudisial kontra otro, ta mustra ku boso a faya kompletamente. No tabata mihó pa boso sufri pèrdida? No tabata mihó pa laga nan hòrta boso numa?

⁸Ma boso mes ta perhudiká otro i ta hasi kos di ladron ku otro; sí, ku boso mes rumannan!

⁹Sigur sigur boso ta na altura ku esnan malbado no tin parti den reino di Dios. No gaña boso mes: hende inmoral, hende ku ta adorá dios falsu, ta kometé adulterio, ta praktiká homoseksualidat òf ta drumi ku un homoseksual,

¹⁰ta hòrta, ta golos pa kos, ta bebe fuma, ta kana zundra otro hende òf ta hasi kos di ladron, niun di nan lo no haña parti den reino di Dios.

¹¹Ántes algun di boso tambe tabata asina. Ma den nòmber di Señor Hesu-Kristu, pa medio di Spiritu di nos Dios, boso a keda purifiká di piká, a keda dediká na Dios i El a aseptá boso komo hustu den su bista.

¹²Tin hende lo bisa: ‘Ami ta liber pa hasi tur kos!’ Sí, pero esei no ke men ku tur kos ta bon pa hasi. Mi por bisa ku mi tin mag di hasi tur kos, pero mi no ta bai laga nada hasi mi katibu.

¹³Otro hende lo bisa: ‘Kuminda ta pa stoma i stoma pa kuminda!’ Sí, pero Dios lo kaba ku tur dos. Kurpa di hende no ta pa inmoralidat seksual, ma pa Señor i Señor ta proveé pa e kurpa:

¹⁴manera Dios a lanta Señor fo'i morto, lo E lanta nos tambe pa medio di su poder.

¹⁵Boso sa ku boso kurpa ta parti di kurpa di Kristu. Awor lo mi kohe parti di Kristu su kurpa i hasié parti di un muhé di bida? Imposibel!

¹⁶Òf ta sa boso no sa ku esun ku uni ku un muhé di bida ta bira ún kuné físikamente? Pasobra Skritura ta bisa: ‘Nan lo bira ún kurpa.’

¹⁷Ma esun ku uni su mes ku Señor, lo bira ún kunÉ spiritualmente.

¹⁸Evitá inmoralidat seksual. Niun otro piká no ta afektá hende su kurpa, ma e hende ku ta hasi su mes kulpabel na inmoralidat, ta peka kontra su mes kurpa.

¹⁹Boso no sa ku boso kurpa ta tèmpel di Spiritu Santu? Dios a duna boso Spiritu Santu i Spiritu Santu ta biba den boso. Boso no ta di boso mes:

²⁰Dios a kumpra boso i a paga e preis! Usa boso kurpa anto pa glorifiká Dios.