Read Papiamento 1 Korintionan 8 Bible Online

1 Korintionan 8 - Papiamento bible

1 Korintionan 8

¹Ban pasa pa e tópiko tokante karni ofresé na dios falsu. Ta bèrdat ku ‘nos tur tin konosementu’, manera nan ta bisa. Ma e konosementu ei ta pone hende hincha bira orguyoso, miéntras amor ta yuda kresementu di iglesia.

²Esun ku ta kere ku e sa algu, no tin e konosementu berdadero.

³Ma esun ku tin amor pa Dios, ta konosí serka djE.

⁴Pa loke ta trata kuminda ofresé na dios falsu, nos sa ku e diosnan falsu ei no ta eksistí di bèrdè i ku ta ún Dios so tin.

⁵Anto ounke den shelu i na tera tin asina yamá dios — i den e sentido ei tin hopi dios i señor —,

⁶pa nos ta ún Dios so tin, esta Dios Tata; El a krea tur kos i ta p'E nos ta biba. Tambe ta ún Señor so tin pa nos, esta Hesu-Kristu; tur kos ta kreá pa medio di djE i nos ta biba pa medio di djE.

⁷Ma no ta tur hende tin e konosementu ei. Tin hende ku a kustumbrá asina tantu ku adorashon di dios falsu, ku te ainda ta kome e tipo di karni ei ku e pensamentu ku ta karni ofresé na e diosnan. Komementu di e karni ei ta afektá nan konsenshi débil.

⁸Sinembargo kuminda no ta drecha nos relashon ku Dios. Es ku no kome no ta pèrdè nada; es ku kome no ta gana nada!

⁹Pero tene kuidou pa no ta boso libertat ta laga esnan suak den fe kai den piká!

¹⁰Suponé ku un hende konsenshi débil mira abo ku tin konosementu, sinta kome den tèmpel dediká na e diosnan falsu; akaso esei lo no kurash'é pa bai kome karni ofresé na dios falsu?

¹¹Anto asin'ei e persona débil ei, un ruman ku Kristu a muri p'e, lo bai pèrdí pa motibu di bo konosementu.

¹²Peka asin'ei kontra boso rumannan kristian ku tin konsenshi débil i mancha nan konsenshi, ta peka kontra Kristu mes!

¹³P'esei, si mi kuminda ta pone mi ruman kai, lo mi no kome karni nunka di mi bida mas pa mi no pone mi ruman kai.