Read Papiamento 2 Korintionan 1 Bible Online

2 Korintionan 1 - Papiamento bible

2 Korintionan 1

¹Esaki ta un karta di Pablo, apòstel di Kristu-Hesus di akuerdo ku boluntat di Dios, i di nos ruman Timoteo, pa e iglesia di Dios na Korinte i pa tur e otro rumannan den henter Gresia.

²Dios nos Tata i Señor Hesu-Kristu duna boso grasia i pas.

³Laga nos alabá Dios i Tata di nos Señor Hesu-Kristu! E ta un Tata mizerikordioso i un Dios ku semper ta konsolá.

⁴E ta Esun ku ta konsolá nos den tur nos tribulashonnan, ya nos por hasi uso di e konsuelo ei, pa konsolá otro hende ku tambe ta pasa den tur sorto di tribulashon.

⁵Pasobra meskos ku nos ta tuma parti na e hopi sufrimentunan di Kristu, asina tambe nos ta haña hopi konsuelo pa medio di djE.

⁶Ke men si nos ta sufri, ta pa boso haña konsuelo i salbashon. Si Dios konsolá nos, ta pa boso haña konsuelo i kapasidat pa soportá ku pasenshi e sufrimentunan ku nos tambe ta pasa aden.

⁷Pa loke ta trata boso, nos speransa ta firme, pasobra nos sa ku meskos ku boso ta tuma parti na e sufrimentu, boso lo tuma parti tambe na e konsuelo.

⁸Rumannan, nos ke pa boso ta na altura di e tribulashonnan ku nos a pasa aden na provinsia di Asia. E kosnan ei tabata asina pisá, asina riba nos forsa, ku nos a desesperá kere ta muri mes nos ta bai muri!

⁹Tabata komo si fuera ta sentensia di morto mes a kai kontra nos. Anto esei a sosodé pa siña nos ku nos no mester a konfia den nos mes, sino den Dios, ku ta lanta hende for di morto!

¹⁰Sí, Dios a salba nos di peliger grandi di morto i lo E bolbe hasié; ta den djE nos ta pone nos konfiansa, p'esei nos sa ku lo E bolbe hasié!

¹¹Boso ta koperá ku esei si boso resa pa nos. Asina hopi hende lo gradisí Dios mashá pa e bondat ku El a mustra nos.

¹²Ún kos ta hasi nos orguyoso: e echo ku nos konsenshi ta sigurá nos ku nos komportashon, en general i spesialmente ku boso, tabata dominá pa e simplesa i sinseridat ku Dios ta duna. No ta sabiduria di hende a guia nos, sino grasia di Dios.

¹³Den nos kartanan, nos no ta skibi nada ku boso no por lesa i komprondé. Mi ta spera ku un dia boso lo komprondé kompletamente

¹⁴loke boso a komprondé parsialmente kaba, esta ku nos ta motibu pa boso ta orguyoso dia Señor Hesus bini bèk, meskos ku boso ta motibu pa nos ta orguyoso.

¹⁵Komo mi tabata konvensí di esei, mi a plania pa bin bishitá boso promé mi bai Masedonia i asina mustra boso kariño dos be.

¹⁶Pasobra mi a plania pa bin bishitá boso ora di bai Masedonia i pa di dos be ora mi ta di regreso. Ya asina boso lo por a yuda mi pa mi sigui ku mi biahe pa Hudea.

¹⁷Awor esei no ke men tòg ku mi no tabata serio ora mi a plania un ke otro? Òf ku mi ta traha plan basá riba probecho propio ku mi ta kla pa bisa ‘sí’ ku ‘nò’ pareu?

¹⁸Pa Dios ku ta fiel, mi ta hura boso ku mi no ta bisa boso ‘sí’ ku ‘nò’ pareu.

¹⁹Pasobra Hesu-Kristu, Yu di Dios, ku ami, Timoteo i Silas a prediká na boso, no ta ‘sí’ ku ‘nò’ pareu. Al kontrario, den djE Dios a duna su ‘sí’.

²⁰Kristu ta konfirmashon di tur promesa ku Dios a hasi, p'esei ta pa medio di djE, nos ta bisa ‘amèn’ na honor di Dios.

²¹Ta Dios mes ta sigurá tantu nos komo boso di e bida ku nos tur tin den union ku Kristu. T'É mes a konsagrá nos,

²²seya nos komo su propiedat i pone Spiritu Santu den nos kurason komo garantia di tur loke lo E bai duna nos.

²³Mi ta yama Dios mes pa testigu i mi ta hura pa mi mes bida: ta pa spar boso, mi no a bai Korinte mas!

²⁴No ku nos ke hasi manera ta boso doño nos ta, pasobra boso ta firme den boso fe kaba. Nos ke djis kolaborá ku boso pa hasi boso kontentu.