Read Papiamento 2 Korintionan 13 Bible Online

2 Korintionan 13 - Papiamento bible

2 Korintionan 13

¹Esaki ta di tres bia ku mi ta bin bishitá boso. Skritura ta bisa: ‘Tur asuntu por keda konfirmá pa testimonio di dos òf mas testigu.’

²Wèl, awor ku mi ta leu, mi ke bolbe bisa esnan ku ta biba den piká i tur e otronan tambe loke mi a bisa un bia kaba: ‘E siguiente bia ku mi bini, niun hende no ta skapa nan kastigu!’

³Asina boso lo haña e prueba ku boso ke mira, esta ku Kristu ta papia pa medio di mi. E no ta trata boso na un manera débil, pero E ta mustra su forsa pa medio di nos.

⁴Pasobra ora ku a krusifiká Hesus, E tabata débil, pero E ta biba pa medio di poder di Dios. Nos tambe ta débil huntu kunÉ, pero boso lo ripará ku nos ta biba huntu kunÉ pa medio di poder di Dios.

⁵Saminá boso mes i husga si boso ta biba den fe. Boso sa tòg ku Kristu ta biba den boso? Si boso no sa esei, boso a faya den e prueba.

⁶Mi ta konfia ku boso lo sa ku nos sí a pasa e prueba ku éksito.

⁷Nos ta resa na Dios pa boso no hasi nada malu; nos no ta hasié pa mustra ku nos a pasa e prueba ku éksito, pero pa boso mes hasi loke ta korekto, ounke por parse ku nos a faya.

⁸Pasobra nos no por hasi nada ku ta bai kontra bèrdat, solamente loke ta na fabor di bèrdat.

⁹Nos ta kontentu ora nos ta débil, basta boso sí ta fuerte. I tambe nos ta resa pa tur loke ta malu serka boso por drecha.

¹⁰P'esei mi ta skibi esaki miéntras mi ta leu fo'i boso, pa ora mi bini serka boso, mi no haña mi obligá di usa mi outoridat na un manera duru ku boso. Señor a duna mi e outoridat ei pa yuda hende krese i no pa kibra nan.

¹¹Finalmente, rumannan, sea kontentu, hasi esfuerso pa alkansá perfekshon, tuma mi palabranan di enkurashamentu na serio, sea ún di pensamentu i biba na pas. I e Dios di amor i pas lo ta ku boso.

¹²Kumindá otro ku un sunchi santu.

¹³Tur e rumannan den fe ta manda kumindamentu pa boso.

¹⁴Grasia di Señor Hesu-Kristu, amor di Dios i e komunion ku Spiritu Santu ta duna sea ku boso tur.