Read Papiamento 2 Korintionan 3 Bible Online

2 Korintionan 3 - Papiamento bible

2 Korintionan 3

¹Ta komo si fuera nos a kuminsá rekomendá nos mes atrobe? Òf por ta ku nos mester di karta di rekomendashon pa boso òf di boso, manera sierto hende?

²Nò, boso mes ta mi karta di rekomendashon, un karta skibí riba nos kurason ku tur hende por lesa i komprondé.

³Ta bon kla tòg ku boso ta un karta di Kristu, skibí ku nos yudansa, no ku enk, pero ku Spiritu di Dios bibu; no riba tabla di piedra, pero riba tabla ku ta kurason di hende.

⁴Nos ta sigur di esei, pasobra danki na Kristu nos konfiansa den Dios ta grandi.

⁵Di nos mes nos no tin kapasidat pa konsiderá algu nos trabou. Nos kapasidat ta bini di Dios,

⁶ku ta hasi nos kapas di ta sirbidó di un aliansa nobo ku no ta dependé di un lei skibí, pero di Spiritu Santu. E lei skibí ta trese morto, pero Spiritu Santu ta duna bida.

⁷E lei ku a keda grabá riba tabla di piedra, a bini ku asina un manifestashon di gloria di Dios, ku e israelitanan no por a keda wak Moises su kara, pasobra su kara tabata bria ku un splendor inmenso. Anto esei tabata un splendor pasahero! Awor si e sistema di lei ku ta hiba na morto, a bini ku dje tantu gloria ei,

⁸kuantu mas intenso gloria di e sistema ku Spiritu Santu ta usa lo no ta!

⁹Pasobra si e sistema ku ta trese kondenashon tabata glorioso, kuantu mas glorioso e sistema ku ta laga Dios aseptá hende komo hustu lo no ta!

¹⁰No por kompará gloria di e tempu aya ku gloria di awor!

¹¹Pasobra si loke tabata pasahero tabatin gloria, kuantu mas gloria loke ta dura pa semper no tin!

¹²P'esei anto, ta pasobra nos tin e speransa akí, nos ta aktua ku hopi kurashi.

¹³Nos no ta manera Moises ku semper a tapa su kara ku un wal pa e israelitanan no ripará ku e splendor, símbolo di e sistema ku ta hiba na morto, tabata mengua bira mas dòf.

¹⁴Pero nan mente a keda tapá: te dia djawe nan mente ta tapá ku e mesun wal ei ora nan ta lesa buki di e aliansa bieu. Ta ora nan kere den Kristu, e wal ta kita,

¹⁵pero te dia djawe tin un wal ta tapa nan mente, kada be ku nan lesa e bukinan di Moises.

¹⁶Loke tin bisá di Moises, ta konta pa nan tambe: ‘Su wal tabata kita for di su kara, ora e tabata bai bèk serka Señor.’[1]

¹⁷Wèl, den e parti akí e palabra ‘Señor’ ta pará pa ‘Spiritu Santu’ i kaminda Spiritu Santu ta, ei tin libertat.

¹⁸Nos tur, sin tin nada pa tapa nos kara, ta mira gloria di Señor manera den un spil i nos ta keda transformá den loke nos ta mira den e spil; nos ta haña mas i mas gloria pa medio di Spiritu di Dios.