Read Papiamento 2 Korintionan 5 Bible Online

2 Korintionan 5 - Papiamento bible

2 Korintionan 5

¹Nos sa ku ora nos kurpa terenal, ku ta manera un tènt, kaba na nada, Dios tin un kas eterno den shelu prepará pa nos, ku no ta man di hende a traha.

²Tanten nos ta biba den e tènt akí, nos ta suspirá i tin deseo pa bai biba bou di dak di nos kas den shelu.

³Ya si kita e tènt akí for di nos,[2] nos no ta keda sunú dilanti di Dios.

⁴Nos ku ta bibando den e tènt akí ainda, ta sigui suspirá bou di peso di aflikshon, pasobra nos no ke deshasí di nos kurpa terenal, pero nos ke bisti e bida selestial manera ta bisti un bistí, ya asina e bida selestial akí por kaba kompletamente ku loke ta mortal den nos.

⁵Dios ta Esun ku a prepará nos pa e kambio akí. I El a duna su Spiritu komo garantia di loke nos lo risibí.

⁶P'esei antó semper nos tin hopi kurashi. Nos sa ku miéntras nos ta biba den e kurpa akí, nos ta leu for di kas di Señor,

⁷pasobra ainda nos no ta biba a base di loke nos ta mira, pero a base di loke nos ta kere.

⁸Nos tin hopi kurashi i nos lo a preferá di bandoná e kurpa akí i bai biba den kas serka Señor.

⁹P'esei mas ku tur kos nos tin ambishon pa biba manera ta agrad'É, sea ku nos ta biba akibou òf ayariba.

¹⁰Pasobra nos tur tin ku aparesé dilanti di Kristu pa E husga nos. Asina kada ken lo haña su pago pa loke el a hasi durante su bida na mundu, sea ta kos bon òf kos malu.

¹¹Nos sa kiko ke men teme Dios; ta p'esei nos ta purba konvensé otro hende. Dios konosé nos intenshonnan i mi ta spera ku boso tambe ta konvensí ku nan ta bon.

¹²Nos no ta kuminsá rekomendá nos mes na boso atrobe, pero nos ta duna boso un bon motibu pa ta orguyoso di nos. Asina boso tin algu pa bisa esnan ku nan orguyo ta basá riba aparensia i no riba loke ta den kurason di hende!

¹³Ora nos hasi manera ta hende loko nos ta, nos ta hasié pa Dios, pero ora nos aktua manera hende na tinu, nos ta hasié pa boso!

¹⁴Pasobra e amor ku Kristu tin pa nos ta determiná loke nos ta hasi, nos ku a bira konsiente ku ún hende a muri pa tur otro hende, ke men ku tur a muri.

¹⁵El a muri pa tur hende, ya esnan ku ta na bida no ta biba pa nan mes, sino solamente pa Esun ku a muri pa nan, Esun ku Dios a lanta for di morto.

¹⁶Ke men antó ku nos no ta husga niun hende segun kriterio humano. Ounke un tempu nos a husga Kristu di e forma ei, awor nos no ta hasié mas.

¹⁷Un hende ku ta uní ku Kristu ta un kreashon nobo. E kosnan di ántes a pasa bai i loke[3] ta nobo a yega.

¹⁸Tur esaki Dios ta hasi; El a rekonsiliá nos kunÉ pa medio di Kristu i a duna nos enkargo pa anunsiá e rekonsiliashon ei.

¹⁹E mensahe di rekonsiliashon ta enserá ku Dios a rekonsiliá mundu kunÉ mes pa medio di Kristu, sin tuma piká di hende na kuenta. Anto El a konfia nos ku e mensahe di rekonsiliashon.

²⁰P'esei ata nos aki komo representante di Kristu; Dios mes ta usa nos pa hasi su apelashon na hende. Nos ta roga boso den nòmber di Kristu: laga Dios rekonsiliá boso kunÉ!

²¹Kristu tabata sin piká, pero Dios a pone nos pikánan riba djE pa asina Dios por aseptá nos komo hustu.