Read Papiamento 2 Korintionan 6 Bible Online

2 Korintionan 6 - Papiamento bible

2 Korintionan 6

¹Komo kolaboradó di Dios nos ta hasi un apelashon na boso pa no laga e grasia ku boso a haña di Dios resultá enbano.

²Pasobra E ta bisa: ‘Na e momento apropiá, Mi a skucha bo orashon; ora e dia di liberashon a yega, Mi a sali pa yuda bo.’ Tende, esaki ta e momento apropiá; awe ta e dia di salbashon!

³Nos no ke hasi nada ku ta ofendé hende, pa nos trabou no haña mal nòmber.

⁴Al kontrario, den tur kos ku nos hasi, nos ta mustra ku nos ta sirbidó di Dios: Ku pasenshi nos a soportá sufrimentu, nesesidat, tribulashon,

⁵sla, prizòn, disturbio públiko, trabou pisá, falta di soño i hamber.

⁶Nos kondukta tabata ireprochabel; nos a aktua ku komprondementu, pasenshi i bondat; nos a hasi tur esaki pa medio di Spiritu Santu, di amor sinsero,

⁷e mensahe di bèrdat i e forsa ku Dios ta duna. Nos arma, tantu pa ataká komo pa defendé nos kurpa, ta enserá kumpli ku boluntat di Dios.

⁸Tin bia ta honra nos, otro bia ta ofendé nos; tin bia ta papia malu di nos, otro bia ta gaba nos. Ta trata nos manera ta sakadó di mentira nos ta, pero nos ta papia bèrdat.

⁹Ta trata nos manera hende deskonosí, kaba nos ta bon konosí. Ta hasi komo si fuera nos ta morto, kaba nos ta yen di bida; nos ta haña kastigu, pero nos no ta muri sí!

¹⁰Ounke por parse ku nos ta tristu, nos ta kontentu sí; nos por parse pober, pero nos ta enrikesé hopi hende. Ta parse manera nos ta planbarí, pero nos ta poseé tur kos!

¹¹Kerido korintionan, nos a papia palabra kla ku boso; nos a habri nos kurason hanchu hanchu pa boso.

¹²No ta nos a sera nos kurason pa boso, ma ta boso a sera boso kurason pa nos!

¹³Mi ta papia ku boso manera un tata lo a papia ku su yunan: hasi meskos ku nos i habri boso kurason hanchu.

¹⁴No mara boso mes na hende ku no ta kreyente, pasobra hustisia i maldat no tin nada di aber ku otro tòg? I lus i skuridat por tin relashon ku otro?

¹⁵No por tin harmonia entre Kristu ku Belial, ni entre un kreyente ku un no kreyente!

¹⁶Tèmpel di Dios no tin nada en komun ku ídolo pagano. Wèl, nos ta tèmpel di e Dios bibu. Dios mes a bisa: ‘Ami lo biba serka nan i lo Mi ta huntu ku nan. Lo Mi ta nan Dios i nan lo ta mi pueblo.’

¹⁷P'esei Señor ta bisa: ‘Sali for di nan kompania, alehá boso di nan; no mishi ku nada impuru! I Ami lo aseptá boso.

¹⁸Ami lo ta un Tata pa boso i boso lo ta mi yu, hòmber i muhé.’ Esei ta loke Señor Todopoderoso ta bisa.