Read Papiamento 2 Korintionan 7 Bible Online

2 Korintionan 7 - Papiamento bible

2 Korintionan 7

¹Rumannan stimá, tur e promesanan akí ta pa nos tambe! P'esei antó laga nos purifiká nos di tur kos ku ta hasi nos impuru na alma i kurpa, i laga nos, ku rèspèt pa Dios, dediká nos kompletamente na djE.

²Laga un lugá hanchu habrí den boso kurason pa nos, pasobra nos no a perhudiká niun hende ni hasi niun hende daño, ni tampoko a probechá di niun di nan.

³No ta pa akusá boso mi ta papia asin'akí! Manera mi a bisa kaba, mi a pega boso na mi kurason; sea ku nos muri òf keda na bida, nos ta keda di otro!

⁴Mi por papia frankamente ku boso i mi ta hopi orguyoso di boso. No opstante tur tribulashon, mi ta yen di kurashi i mi kurason ta brota di alegria.

⁵Ora nos a yega Masedonia, nos no por a haña trankilidat. Tabatin problema tur kaminda: lucha rònt di nos i miedu den nos mes kurason!

⁶Pero Dios ku ta kurashá esnan ku ta deskurashá, a kurashá nos ku bishita di Tito.

⁷I no djis pasobra el a bini serka mi, sino tambe pasobra, danki na boso, el a bini ku mashá ánimo. El a konta nos di boso deseo profundo di mira mi, di boso tristesa i di boso zelo pa yuda mi; p'esei awor mi ta mas kontentu ainda.

⁸Ounke e karta ku mi a skibi a hasi boso tristu, mi no tin duele ku mi a skibié! Sí ta asina ku promé a duel mi, ora mi a ripará ku e karta ei a hasi boso tristu, maske tabata pa un poko tempu.

⁹Pero awor akí mi ta sinti mi kontentu! No pasobra mi a hasi boso tristu, sino pasobra boso tristesa a hiba boso na arepentimentu. Boso tabata tristu na un manera ku ta agradá Dios, p'esei nos no a perhudiká boso den nada.

¹⁰Pasobra tristesa ku ta agradá Dios ta hiba na kombershon ku ta trese salbashon i esei no ta duel niun hende! Pero e tristesa netamente humano ta hiba na morto.

¹¹Boso tristesa tabata di un manera ku ta agradá Dios i mira e resultado awor! Mira kuantu zelo boso a mustra, kon boso a defendé boso mes i mustra indignashon! Mira boso ansha, boso deseo profundo pa mira mi, boso esfuerso i boso manera di kastigá maldat! Den tur forma boso a demostrá ku boso no tin falta mas den e asuntu akí.

¹²Ke men anto, ounke mi a manda boso e karta, no tabata pa motibu di esun ku a kometé e fayo òf pa esun ku tabata su víktima. Al kontrario, tabata pa mustra boso bon kla, den bista di Dios, kon ansioso boso tabata pa yuda nos.

¹³Anto ta p'esei mes nos ta asina kurashá! Huntu ku e ánimo ku nos a haña serka boso, nos a bira hopi mas kontentu ainda di mira kon felis Tito mes a keda ku boso a trankilis'é.

¹⁴Mi a broma ku boso serka dje i boso no a laga mi kara na bèrgwensa! Sí, semper nos a papia bèrdat ku boso i loke nos a broma kuné serka Tito, tambe a sali bèrdat!

¹⁵Kada be ku Tito kòrda kon boso tur a obedesé su instrukshonnan i kon boso a akoh'é ku un rèspèt profundo, e ta haña mas i mas kariño pa boso.

¹⁶Anto mi ta kontentu ku mi por a konfia kompletamente riba boso!