Read Papiamento 2 Korintionan 8 Bible Online

2 Korintionan 8 - Papiamento bible

2 Korintionan 8

¹Awor, rumannan, nos ke pa boso ta na altura di e grasia ku Dios a mustra e iglesianan na Masedonia.

²Ounke nan a pasa den prueba pisá, nan tabata mashá kontentu i ounke nan tabata mashá pober, nan kontribushonnan tabata mes generoso ku di hende riku.

³Mi ta sigurá boso ku nan a duna segun nan forsa i asta riba nan forsa! Di nan mes

⁴nan a roga ku mashá insistensia pa nan tambe por duna algu pa yuda e kreyentenan na Hudea.

⁵Nan a duna mas ku loke nos a spera: promé nan a entregá nan mes na Señor i despues na nos, manera Señor mes tabata ke.

⁶P'esei nos a pidi Tito pa terminá e obra di karidat akí ku el a kuminsá serka boso.

⁷Boso tin tur kos na abundansia: fe, elokuensia, konosementu, zelo sin límite i nos amor pa boso;[4] p'esei duna na abundansia pa e obra di karidat akí tambe.

⁸No ku mi ke manda riba boso, pero dor di mustra boso kon ansioso otro hende ta pa yuda, mi ke haña sa kon real boso amor ta.

⁹Boso mes sa ku nos Señor Hesu-Kristu, den su bondat, a bira pober pa boso ounke E tabata riku, ya boso por a bira riku pa medio di su pobresa!

¹⁰Ta un konseho so mi ta duna boso pa boso mes bon. For di aña pasá boso tabatin un plan kaba i boso a kuminsá pon'é den práktika.

¹¹Wèl awor terminá e trabou! Sea mes ansioso ku boso tabata dia a plani'é, pa terminá e trabou, segun boso forsa!

¹²Kaminda tin boluntat pa duna i hende duna segun su forsa, Dios ta aseptá e kontribushon. Dios no ta spera di niun hende pa e duna loke e no tin.

¹³No ta intenshon pa boso pasa trabou yudando otro hende; tur kos mester bai a base di igualdat.

¹⁴Boso ku awor akí tin na abundansia, mester yuda esnan ku ta den nesesidat, pa despues, ora boso ta den nesesidat, esnan ku tin na abundansia por yuda boso. Asina tur dos grupo ta haña un trato igual.

¹⁵Ta manera Skritura ta bisa: ‘Esun ku a kohe hopi, no tabatin di mas ni esun ku a kohe tiki, no tabatin di ménos.’

¹⁶Nos ta gradesido na Dios ku El a hasi Tito mes ansioso ku nos pa yuda boso.

¹⁷No solamente el a aseptá nos petishon, pero e tabata asina ansioso pa yuda boso ku di su propio boluntat e ta bin mira boso.

¹⁸Huntu kuné nos ta manda un ruman ku ta mashá respetá den tur iglesia pa su trabou pa kousa di e bon notisia.

¹⁹Ademas e iglesianan a skoh'é pa biaha huntu ku nos i yuda nos den e obra di karidat ku nos ta hasi pa honra Dios i mustra nos deseo di yuda boso.

²⁰Asin'akí nos ta spera di evitá kualke sospecho kontra nos pa loke ta trata maneho di e suma grandi di kontribushon.

²¹Nos intenshon ta pa hasi loke ta bon, no solamente den bista di Dios, pero tambe den bista di hende.

²²Huntu ku nan nos ta manda un otro ruman ku, hopi bia i bou di diferente sirkunstansia, a demostrá di ta un ruman ku ta ansioso pa yuda. I awor ku e tin asina tantu konfiansa den boso, e ta mas ansioso ainda pa yuda.

²³Pa loke ta trata Tito, e ta mi kompañero i ta kolaborá ku mi pa yuda boso. E otro rumannan ku ta bai huntu kuné, ta representá e iglesianan; nan ta hende ku ta honra Kristu.

²⁴Mustra nan ku boso ta stima nan pa proba e iglesianan ku ta ku rason nos ta broma ku boso.