Read Papiamento Galatanan 1 Bible Online

Galatanan 1 - Papiamento bible

Galatanan 1

¹Esaki ta karta di mi, Pablo, apòstel nombrá ni mandá dor di hende, sino dor di Hesu-Kristu i Dios Tata ku a lant'É for di morto. Ami ku tur e rumannan ku ta huntu ku mi ta kumindá e iglesianan den region di Galasia.

³Dios nos Tata i Señor Hesu-Kristu mustra boso su bondat i duna boso pas.

⁴Segun boluntat di nos Dios i Tata, Hesu-Kristu a entregá su mes bida pa nos pikánan pa libra nos di e era akí ku ta dominá pa maldat.

⁵Gloria na Dios pa semper i semper! Amèn.

⁶Mi a keda hopi asombrá ku den korto tempu asina ya boso a bandoná e Dios ku a yama boso pa medio di e grasia ku ta bini dor di Kristu. Boso a bandon'É pa sigui un otro supuesto evangelio.

⁷En realidat no tin otro evangelio. Loke ta pasa ta ku tin algun hende ta bruha boso i ta trata di kambia e evangelio tokante Kristu.

⁸Pero asta si nos mes òf un angel for di shelu prediká un otro evangelio na boso, diferente for di esun ku nos a prediká kaba, maldishon di Dios kai riba dje!

⁹Mi a bisa un be kaba i awor mi ta ripití: Si kualke hende mester prediká un evangelio ku ta diferente for di esun ku boso a aseptá, maldishon di Dios kai riba dje!

¹⁰Ta aprobashon di hende mi ta buska? Nò, ta aprobashon di Dios! Ta popular mi ke ta den bista di hende? Nò, si tabata asina, lo mi no tabata sirbidó di Kristu.

¹¹Laga mi pone na boso konosementu rumannan, ku e evangelio ku mi a prediká no ta algu ku hende a inventá.

¹²Mi no a risibí e bon notisia akí di hende ni niun hende no a siña mi e, sino mi a hañ'é pa medio di un revelashon di Hesu-Kristu.

¹³Boso a tende tòg kon mi tabata biba tempu mi tabata sigui religion hudiu; sin mizerikòrdia mi tabata persiguí iglesia di Dios i tabata buska pa destruyé.

¹⁴Den religion hudiu mi tabata progresá mas ku hopi otro hudiu di mi mes edat den siguimentu di e tradishonnan di mi antepasadonan, pasobra mi tabata mas zeloso ku nan tur.

¹⁵Pero Dios ku a skohe mi i ku den su bondat a yama mi, a hiba di gustu di revelá su Yu den mi bida. El a hasié pa mi prediká e evangelio tokante E na esnan no hudiu. Ora esaki a sosodé, mi no a kore pidi niun hende konseho.

¹⁷Tampoko mi no a kohe kaminda pa Herusalèm bai serka esnan ku tabata apòstel promé ku mi, pero mi a bai Arabia i despues Damasko bèk.

¹⁸Tres aña despues mi a bai Herusalèm pa sera konosí ku Kefas i a keda diessinku dia serka dje.

¹⁹Mi no a mira niun otro apòstel sino Hakobo, ruman di Señor.

²⁰Dilanti di Dios mi ta sigurá boso ku loke mi ta skibi ta bèrdat!

²¹Despues mi a bai bishitá algun region na Siria i Silisia.

²²Pero e rumannan den Kristu di e iglesianan na Hudea sí no tabata konosé mi personalmente.

²³Tende nan a tende hende bisa: ‘Ántes e hòmber akí tabata persiguí nos, i awor at'é ta prediká e mesun fe ku e ker a destruí!’

²⁴Anto e ora ei nan tabata alabá Dios pa loke a sosodé ku mi.