Read Papiamento Galatanan 4 Bible Online

Galatanan 4 - Papiamento bible

Galatanan 4

¹Esaki ta loke mi ke men: miéntras un heredero ta menor di edat, no tin niun diferensia entre e i un katibu di kas, ounke en realidat e heredero ta doño di tur kos.

²Tin hende spesial pa kuid'é i pa sòru pa su asuntunan te ora e dia yega ku e tata a stipulá.

³Meskos tambe a pasa ku nos ku ta hudiu: tempu nos tabata menor di edat nos tabata katibu di e podernan di kòsmòs.

⁴Pero ora e momento ku Dios a stipulá a yega, El a manda su Yu, ku a nasé di un hende muhé i ku tabata someté na lei di Moises,

⁵pa asina reskatá nos ku tabata sometí na Lei i tambe pa hasi ku nos por bira yu adoptivo di Dios.

⁶I esaki ta e prueba ku boso ta yu: Dios a manda Spiritu di su Yu den nos kurason i e Spiritu akí ta sklama: ‘Abba, Tata!’

⁷Ke men antó ku bo no ta katibu mas, pero yu di Dios i ta Dios su boluntat pa, komo yu, bo ta heredero tambe!

⁸Ántes, tempu boso no tabata konosé Dios, boso tabata katibu di loke en realidat no ta Dios.

⁹Pero awor ku boso a siña konosé Dios, òf mihó bisá, awor ku Dios ker a konosé boso, kon ta posibel ku boso ta bolbe someté boso na e podernan spiritual débil i mizerabel ei? Akaso boso ke bolbe bira nan katibu atrobe?

¹⁰Mira kon boso ta selebrá sierto dia, luna, temporada i aña spesial!

¹¹Mi tin miedu ku e trabou duru ku mi a traha na boso benefisio, tabata enbano!

¹²Rumannan, mi ta pidi boso: sea manera mi, pasobra ami a bira manera boso. No ku mi ta bisa ku boso a hasi mi niun daño sí.

¹³Manera boso sa kaba, e promé bia ku mi a prediká e bon notisia na boso, tabata pa motibu di mi enfermedat.

¹⁴I ounke mi tabatin un enfermedat ku por a pone boso rechasá mi, tòg boso no a mustra niun tiki menospresio òf rechaso! Al kontrario, boso a risibí mi komo si fuera mi tabata un angel di Dios òf Kristu-Hesus mes!

¹⁵Awor ta kiko a pasa antó ku e alegria ei ku boso tabata sinti? Esaki sí mi tin ku bisa di boso: e tempu ei boso lo a saka boso wowo mes duna mi si tabata posibel.

¹⁶I awor mi a bira boso enemigu, pasobra mi ta bisa boso bèrdat?

¹⁷Mi oponentenan ta mustra mashá interes den boso, pero no ku bon intenshon. Ta kita nan ke kita nos for di otro pa boso bai traha na nan interes!

¹⁸Ta bunita bringa pa un bon kousa, pero hasié tur ora, no solamente ora mi t'ei!

¹⁹Mi yunan, un bia mas mi ta pasa den dolónan di parto pa boso, te ora boso keda formá segun imágen di Kristu.

²⁰Esta hopi gana mi tin di por tabata huntu ku boso awor akí i papia ku boso na otro un manera, pasobra na e momento akí mi no sa ki pensa di boso!

²¹Boso ku ke someté boso na Lei di Moises, tende mi un kos aki: Boso no ta pone atenshon na loke Lei di Moises mes ta bisa?

²²Wèl e ta bisa ku Abraham tabatin dos yu: un ku e muhé katibu, e otro ku e muhé liber.

²³E yu di e katibu a nase na un manera puramente humano, pero e yu di e muhé liber a nase komo resultado di e promesa ku Dios a hasi.

²⁴Esaki tin un nifikashon simbóliko. E dos muhénan ta representá e dos aliansanan: un ta e aliansa di seru di Sinai ku ta produsí katibu; esei ta Hagar.

²⁵Ke men antó ku Hagar ta representá seru di Sinai na Arabia i esei na su turno ta símbolo di e Herusalèm djawendia, pasobra e siudat akí i tur su habitantenan ta bou di yugo di sklabitut.

²⁶Pero e Herusalèm selestial ta liber i nos ta su yu.

²⁷Pasobra Skritura ta bisa: ‘Muhé ku nunka no a pari, ku nunka no a konosé doló di parto, keda kontentu i basha gritu di húbilo, pasobra abo, muhé bandoná, lo ta riku na yu, mas riku ku kualke muhé ku esposo!’

²⁸Rumannan, meskos ku Isak boso ta e yu ku Dios a primintí.

²⁹Pero meskos ku den e tempu aya e yu ku a nase na un manera puramente humano, tabata persiguí esun ku a nase pa obra di Spiritu di Dios, e ta sosodé awor tambe.

³⁰Pero kiko Skritura ta bisa? Wèl, e ta bisa: ‘Kore ku e kriá i ku su yu, pasobra yu di e kriá no por kompartí e herensia ku e yu liber.’

³¹Ke men antó, rumannan, ku nos no ta yu di e katibu, pero yu di e muhé liber!