Read Papiamento Galatanan 5 Bible Online

Galatanan 5 - Papiamento bible

Galatanan 5

¹Kristu a duna nos libertat pa hasi nos liber di bèrdat; p'esei para firme den e libertat ei i no bolbe someté boso na yugo di sklabitut.

²Marka mi palabra! Ami, Pablo, ta bisa boso: si boso laga sirkunsidá boso, Kristu no ta sirbi boso pa nada.

³Mi ke ripití pa esun ku laga sirkunsidá su mes ku e ora ei e ta obligá pa kumpli ku henter Lei di Moises.

⁴Boso ku ke pa Dios aseptá boso komo hustu, pasobra boso ta kumpli ku Lei, a keda separá di Kristu. Boso a benta grasia di Dios afó.

⁵Nos, enkambio, ansiosamente ta spera pa medio di Spiritu di Dios, ku Dios ta aseptá nos pa medio di fe.

⁶Pasobra serka siguidónan di Kristu-Hesus no ta importante si un hende ta sirkunsidá òf nò. Ta e fe ku ta funshoná pa medio di amor ta konta.

⁷Boso tabata progresá asina bon! Ta ken a stroba boso di obedesé bèrdat?

⁸E loke nan a bisa pa konvensé boso no ta bini di Dios ku ta yama boso.

⁹Kòrda: un tiki zürdeg ta pone henter e mansa reis!

¹⁰Mi ta konfia den Señor ku boso lo no kambia boso manera di pensa, pero Dios lo kastigá esun ku ta bruha boso, no ta importá ken e ta.

¹¹Pa loke ta toka ami, rumannan, si te ainda mi ta insistí ku sirkunsishon tin su balor i ta sigui hasié ketu bai, pakiko hudiunan ta persiguí mi antó? E ora ei e mensahe di salbashon pa medio di krus lo no a ofendé nan!

¹²Mare esnan ku ta kana molestiá boso por hasi un trabou kompleto i no solamente sirkunsidá, pero kastra nan mes tambe!

¹³Rumannan, boso ta yamá pa ta liber. Pero no usa e libertat ei pa entregá boso mes na mal deseo. Mas bien sirbi otro pa medio di amor.

¹⁴Pasobra por resumí henter Lei di Moises den esun mandamentu akí: ‘Stima bo próhimo manera bo ta stima bo mes.’

¹⁵Tene kuidou, pasobra si boso sigui morde i habraká otro, a lo largu boso mes lo kaba ku otro!

¹⁶P'esei mes mi ta bisa: Si boso laga Spiritu di Dios dirigí boso bida, boso lo no satisfasé boso mal deseonan.

¹⁷Pasobra mal deseo ta bringa Spiritu di Dios i E ta bringa nan! Esun ta bai kontra di e otro, ke men ku boso no por djis hasi loke boso ke!

¹⁸Pero si ta su Spiritu ta guia boso, boso lo no ta someté na Lei.

¹⁹Ta bon kla kiko esnan ku ta sigui nan mal deseonan ta hasi. Nan ta kometé akto di inmoralidat, nan ta hasi kos impuru i ta biba un bida parotin;

²⁰nan ta adorá dios falsu i praktiká bruheria; nan tin un aktitut hostil, nan ta trese pleitu i ta envidiá otro hende. Nan ta kla pa rabia, nan ta buska nan mes probecho i ta trese desunion i partidismo.

²¹Nan ta hende yalurs, buraché, parandero i otro kos semehante. Mi ta atvertí boso manera mi a hasi un bia kaba: esnan ku komportá nan asina lo no tin parti den reino di Dios.

²²Pero loke Spiritu di Dios ta generá den hende ta amor, goso, pas, pasenshi, amabilidat, bondat, fieldat,

²³humildat i dominio propio. E kosnan ei no ta bai kontra ningun lei.

²⁴Esnan ku ta pertenesé na Kristu-Hesus, ya a krusifiká e hende pekadó den nan mes, huntu ku su pashon- i mal deseonan.

²⁵Si ta pa medio di Spiritu di Dios nos ta biba, nos mester laga su Spiritu guia nos.

²⁶Nos no mester ta arogante, ni proboká ni envidiá otro!