Read Papiamento Efesionan 3 Bible Online

Efesionan 3 - Papiamento bible

Efesionan 3

¹P'esei ami, Pablo, ta resa pa boso, ami ku ta prizonero pasobra mi ta sirbidó di Kristu-Hesus i na benefisio di boso ku no ta hudiu.

²Sigur boso a tende kaba di e enkargo ku Dios den su grasia a duna mi pa sirbi boso.

³Esta kon Dios a revelá mi su boluntat skondí, tokante kua mi a skibi boso brevemente kaba.

⁴Segun boso ta les'é, boso por haña un idea di mi konosementu di e boluntat skondí di Dios tokante Kristu.

⁵Esei tabata skondí pa e hendenan di ántes, ma awor Dios a revel'é na su apòstel- i profetanan santu pa medio di su Spiritu.

⁶Anto esaki ta loke tabata skondí: ku esnan ku no ta hudiu, pa medio di predikamentu di e bon notisia i di nan union ku Kristu, huntu ku nos, ku ta hudiu, ta tuma parti na e mesun herensia, ta bira miembro di e mesun kurpa i ta risibí e mesun promesa di Dios.

⁷Mi a bira sirbidó di e bon notisia, un privilegio ku Dios den su grasia a duna mi, pa medio di e forsa ku ta traha den mi.

⁸Dios a duna Ami, esun ménos ku tur e otro kreyentenan, privilegio di proklamá e bon notisia tokante e rikesa inkalkulabel di Kristu, na esnan ku no ta hudiu.

⁹Ami mester laga tur hende mira[5] kon e boluntat di Dios ei, ku durante tur e siglonan ku a pasa tabata skondí den Dios, kreador di tur kos, ta keda kumplí.

¹⁰Asina antó awor e outoridat- i gobernantenan den e regionnan selestial ta siña konosé, pa medio di iglesia, sabiduria di Dios ku ta mustra su mes den hopi diferente forma.

¹¹Dios a hasi esei di akuerdo ku e plan eterno ku El a ehekutá pa medio di Kristu-Hesus, nos Señor.

¹²Anto den Kristu nos tin libertat pa bai serka Dios ku e konfiansa ku nos fe den Kristu ta duna nos.

¹³P'esei mi ta roga boso pa no pèrdè kurashi awor ku mi ta sufri pa boso; esei ta mas bien un honor pa boso.

¹⁴Sí, p'esei mi ta dobla mi rudia dilanti di Dios Tata,[6]

¹⁵ku a duna tur komunidat den shelu i riba tera nan eksistensia i nòmber.

¹⁶Mi ta pidiÉ pa for di su rikesa glorioso i pa medio di Spiritu Santu, E fortalesé boso ku poder den profundidat di boso ser.

¹⁷I mi ta pidi pa Kristu biba den boso kurason pa medio di fe, pa boso keda ankrá den amor i pa esei sea boso fundeshi.

¹⁸Di e manera ei boso lo ta kapas di komprondé, huntu ku tur e fielnan, kon largu, hanchu, altu i profundo amor di Kristu ta.

¹⁹Mi ta pidi pa boso konosé su amor i asina keda yená ku e plenitut kompleto di Dios; e amor ei ta mas grandi ku kualke kos ku nos por konosé.

²⁰Gloria na Dios, ku por hasi infinitamente mas di loke nos por pidi òf pensa, pa medio di su poder ku ta trahando den nos.

²¹Ku pa semper E haña gloria den iglesia i den Kristu-Hesus, siglo tras di siglo. Amèn!