Read Papiamento Efesionan 5 Bible Online

Efesionan 5 - Papiamento bible

Efesionan 5

¹Unabes ku boso ta Dios su yu stimá, hasi esfuerso pa sigui su ehèmpel.

²Biba den amor; tuma ehèmpel di Kristu ku a stima nos i a entregá su bida pa nos komo un sakrifisio ku ta hole dushi, un ofrenda ku ta agradá Dios.

³No ta pas pa esnan ku ta pertenesé na e pueblo santu hasi ni menshon mes di kos manera inmoralidat, kualke tipo di impuresa òf avarisia!

⁴Tampoko no ta pas pa papia palabra grosero, papia kos di loko, konta chiste indesente. Ma al kontrario gradisí Dios.

⁵Boso por ta sigur di esaki: niun hende ku ta inmoral, impuru i haragan pa kos — e último kos ei ta igual na idolatria — no por tuma parti den reino di Kristu i di Dios!

⁶No laga niun hende ku bini ku palabra sokete, gaña boso. Pasobra ta eksaktamente pa motibu di e tipo di kos ei mes, Dios lo kastigá e hendenan ku no ke tende di djE.

⁷P'esei antó no sea kómplise di e hendenan ei!

⁸Un tempu boso mes tabata den skuridat, ma awor ku boso ta uní ku Señor, boso ta den lus! Komportá boso pues manera hende ku ta biba den lus.

⁹Ta lus[8] ta produsí tur klase di bondat, hustisia i bèrdat.

¹⁰Purba diserní loke ta agradá Señor.

¹¹No partisipá na e aktonan inútil di hende ku ta biba den skuridat, pero eksponé nan aktonan!

¹²Bo ta haña asta bèrgwensa di menshoná e kosnan ku nan ta hasi den sekreto!

¹³I ora un kos bai den lus, su naturalesa berdadero ta sali na kla,

¹⁴pasobra tur kos ku keda revelá den un forma kla, ta bira igual na lus. P'esei tin bisá: ‘Abo ku ta drumí, lanta; lanta for di morto! Pa Kristu bria riba bo!’

¹⁵Paga bon tinu antó kon komportá boso,[9] no manera hende bobo, sino ku sabiduria!

¹⁶I probechá di kualke oportunidat ku presentá, pasobra nos ta biba den tempu malu.

¹⁷P'esei no sea insensato, ma buska pa konosé boluntat di Señor.

¹⁸No bebe burachi, pasobra biña ta pone hende pèrdè kabes, ma laga Spiritu Santu yena boso.

¹⁹Kanta salmo-, himno- i kantikanan inspirá, pa otro. Kanta i toka pa Señor ku henter boso kurason.

²⁰Semper yama Dios Tata danki pa tur kos, den nòmber di nos Señor Hesu-Kristu.

²¹Someté boso na otro pa motibu di e rèspèt ku boso tin pa Kristu.

²²Señoranan, someté boso na boso esposo, manera boso ta someté boso na Señor!

²³E hòmber ta kabes di su esposa, manera Kristu ta kabes di iglesia. Tambe Kristu ta salbador di iglesia, ku ta su kurpa.

²⁴Pues manera iglesia ta someté na Kristu, e muhénan tambe mester someté, sin reserva, na nan esposo.

²⁵Hòmbernan, stima boso esposa, manera Kristu a stima iglesia i a entregá su bida p'e.

²⁶Esaki Kristu a hasi pa E limpia iglesia i konsagr'é na Dios pa medio di awa i su palabra.

²⁷Asina El a prepará un iglesia radiante, sin mancha, ploi òf algu paresido, un iglesia santu i sin kulpa, pa E mes.

²⁸Ta asin'ei hòmbernan mester stima nan esposa; nan mester stima nan manera nan ta stima nan mes kurpa, pasobra e hòmber ku ta stima su esposa, ta stima su mes!

²⁹Nunka niun hende no a odia su mes kurpa; ma e ta kuid'é i aliment'é. Esei ta loke Kristu ta hasi ku su iglesia,

³⁰pasobra ta su kurpa. I nos ta miembro di e kurpa ei.[10]

³¹Skritura ta bisa: ‘P'esei un hòmber lo laga su tata i su mama pa uni ku su kasá i nan dos lo ta un.’

³²Tin un gran bèrdat skondí den e asuntu akí i mi ta relashon'é ku iglesia.

³³Ma e ta konta pa boso tambe: Kada hòmber mester stima su mes esposa manera e ta stima su mes i kada muhé mester respetá su esposo.