Read Papiamento Filipensenan 2 Bible Online

Filipensenan 2 - Papiamento bible

Filipensenan 2

¹N' ta asina ku mi a ekshortá boso na nòmber di Kristu, kurashá boso ku amor? N' ta asina ku boso a eksperensiá komunion pa medio di Spiritu Santu i kompashon i mizerikòrdia di Dios?

²Awèl, hasi mi legria bira mas kompleto ainda i sea un di pensamentu, un di kurason i mente.

³No hasi nada pa ambishon egoista, ni buya barata, ma sea humilde i konsiderá e otro di ta mas ku bo.

⁴No fiha solamente riba boso kada un su mes interes, sino riba esun di e otro tambe.

⁵Boso mester tin e mesun aktitut ku Kristu-Hesus tabatin:

⁶Ounke E tabata meskos ku Dios, E no ker a para riba su derecho di keda igual na Dios.

⁷Nò, El a pone esei un banda; El a bira meskos ku un katibu, i a bira igual na hende. I ora El a aparesé komo hende,

⁸El a humiliá su mes i a bira obedesidu te na morto, sí, morto na krus.

⁹P'esei Dios a als'É na e lugá di mas altu i a dun'É e nòmber ku ta riba tur otro nòmber.

¹⁰Pa asina na honor di nòmber di Hesus tur kriatura dobla nan rudia, tantu esnan den shelu, komo esnan riba tera i den e mundu bou di tera.

¹¹I nan tur konfesá ku Hesu-Kristu ta Señor, pa gloria di Dios Tata.

¹²Amigunan stimá, boso a obedesé mi semper. P'esei sigui traha ku temor i rèspèt pa boso salbashon tin resultado konkreto den boso bida, no solamente manera boso tabata hasi ora mi tabat'ei, ma awor mas ku nunka den mi ousensia.

¹³Pasobra Dios ta Esun ku ta traha den boso pa hasi boso kapas, no solamente pa deseá loke ta kuadra ku su boluntat, ma di kumpli kuné tambe.

¹⁴Hasi tur kos sin murmurá i sin diskutí,

¹⁵pa niun hende no tin nada di remarká di boso i pa boso ta inosente, yu sin mancha di Dios ku ta biba meimei di hende korumpí i perverso. Meimei di nan boso ta bria manera strea na shelu,

¹⁶segun ku boso ta ofresé nan e palabra di bida.[2] Asina mi por ta orguyoso dia di Kristu su binida, ya e ora ei lo mi no a kore ni traha enbano.

¹⁷Ma si mi mester basha mi sanger komo ofrenda huntu ku e sakrifisio ku boso fe ta ofresé na Dios, mi ta kontentu i ta kompartí mi legria ku boso tur.

¹⁸I boso tambe: Sea kontentu i kompartí boso legria ku mi!

¹⁹Mi ta spera ku konfiansa den Señor Hesus ku pronto mi por manda Timoteo serka boso, pa mi tambe haña kurashi ora mi tende kon ta bai ku boso.

²⁰Mi no tin niun otro hende ku ta di mes pensamentu ku mi i ku realmente ta sinti pa boso.

²¹Pasobra ta nan mes probecho tur e otronan ta buska i no di Hesu-Kristu.

²²Boso mes sa kon Timoteo a proba su mes, pasobra huntu ku mi, manera un yu ku su tata, el a traha sirbi kousa di e bon notisia.

²³P'esei anto mi ta spera di mand'é asina mi haña sa un ke otro tokante mi situashon.

²⁴Ma mi ta konfia den Señor ku mi mes tambe por bini pronto.

²⁵Mi a haña ta nesesario di manda Epafrodito serka boso, pasobra e ta mi ruman i kompañero den lucha i den trabou serka boso i a sirbi komo boso mensahero pa kumpli ku mi nesesidatnan.

²⁶E tin mashá gana di mira boso i ta sintié malu, pasobra boso a tende di su malesa.

²⁷Enberdat e tabata malu i a hera di muri. Ma Dios a tene mizerikòrdia kuné i no kuné so, ku mi tambe, pa asina mi no haña mi ku doló tras di doló.

²⁸P'esei mi ta mand'é mas lihé ainda pa boso, ya boso por ta kontentu atrobe ora boso mir'é i mi doló por baha.

²⁹Ke men, risibié anto ku hopi legria komo ruman den Señor. Mustra rèspèt na hende manera e,

³⁰pasobra el a hera di muri pa kousa di e trabou di Kristu, ora el a riska su bida pa sirbi mi, pasobra boso mes no por a hasié.