Read Papiamento Filipensenan 3 Bible Online

Filipensenan 3 - Papiamento bible

Filipensenan 3

¹Mi rumannan, pa konkluí: keda kontentu den Señor!

²No ta molèster pa mi ripití loke ya mi a skibi boso kaba i esei ta duna boso mas seguridat. Tene kuidou ku e hasidónan di maldat! Tene kuidou ku e kachónan ei! Warda boso kurpa for di esnan ku ta insistí ku mester kòrta kurpa!

³Pasobra ta nos ta esnan ku a risibí e sirkunsishon berdadero; nos ku ta adorá Dios pa medio di su Spiritu i ta basa nos orguyo riba Kristu-Hesus, sin konfia riba kosnan eksterno.

⁴Ounke ta klaro ku mi tin motibu pa pone mi konfiansa den kos asina. Pasobra si tin kualke hende ta pensa ku e por konfia den su mes, ami sigur por hasié:

⁵Mi ta israelita di nasementu, sirkunsidá riba e di ocho dia; mi ta pertenesé na tribu di Benhamin i ta hebreo di pura sepa. Mi a biba segun lei di akuerdo ku e reglanan di e grupo di fariseo.

⁶Mi a mustra mi zelo dor di persiguí iglesia; pa loke ta trata kumplimentu ku lei, niun hende no tin nada di remarká.

⁷Ma awor tòg mi ta konsiderá tur e kosnan akí, ku na mi pareser tabata ganashi, un pèrdida pa motibu di Kristu.

⁸Ma mas ku esei, no solamente e kosnan ei, sino tur kos mes mi ta konsiderá di ta un pèrdida, kompará ku konosé Kristu-Hesus, mi Señor. Esei ta mas balioso ku tur otro kos! Pa su motibu mi a entregá tur kos i mi ta konsiderá tur e kosnan ei bagas, pa asin'ei mi por gana Kristu

⁹i ta uní kunÉ. Ku Dios ta aseptá mi komo hustu no ta basá riba mi kumplimentu ku lei. Ma esei ta bini pa medio di fe den Kristu; esei ta bini di Dios i ta basá riba fe.

¹⁰Mi ke konosé Kristu, eksperensiá poder di su resurekshon i kompartí su sufrimentu; mi ke bira manera E den su morto.

¹¹Anto asin'ei mi ta spera ku lo mi resusitá for di morto.

¹²Mi no ta bisa ku mi a alkansá esei òf ta perfekto kaba. Ma mi ta sigui pusha bai dilanti, pa mi gar'é; ta pa e motibu ei Kristu-Hesus a gara mi.

¹³Rumannan, mi mes no ta pensa ku mi a gar'é kaba; ma un kos sí: mi ta lubidá tur loke ta tras di lomba i ta rèk pa gara loke ta mi dilanti.

¹⁴Mi ta pusha bai dilanti pa mi yega na e meta i asina gana e premio ku Dios, pa medio di Kristu-Hesus, ta yama nos bin risibí ayariba.

¹⁵P'esei antó, laga nos ku ta kreyente madurá pensa meskos, ma si boso ta pensa otro tokante un ke otro, Dios mes lo revelá boso kiko ta bèrdat.

¹⁶Ma en todo kaso, laga nos sigui riba e kaminda ku nos a rekoré kaba.

¹⁷Rumannan, boso tur huntu, imitá mi i fiha boso bista riba esnan ku den nan andá ta sigui ehèmpel ku nos a duna.

¹⁸Pasobra mi ta bolbe ripití, ku awa na wowo, loke mi a bisa boso hopi bia kaba: tin hopi hende ta biba manera ta enemigu di Kristu su krus nan ta.

¹⁹Nan lo kaba den pèrdishon; nan barika a bira nan dios; nan ta orguyoso di nèt e kosnan ku mester ta un bèrgwensa pa nan! Ta riba kos di mundu so nan ta pensa!

²⁰Ma nos patria ta den shelu; fo'i djei nos ta warda nos Salbador, Señor Hesu-Kristu, bini!

²¹E lo transformá nos kurpa mizerabel den kurpa glorioso, meskos ku esun di djE. Pa hasi esei lo E usa e poder ku E tin pa someté tur kos na su outoridat.