Read Papiamento Kolosensenan 4 Bible Online

Kolosensenan 4 - Papiamento bible

Kolosensenan 4

¹Boso ku ta shon di katibu, trata nan na un manera hustu i korekto; tene kuenta ku boso tambe tin un Shon den shelu.

²Perseverá den orashon; resa alerta i yama Señor danki.

³Resa tambe pa nos, pa Dios habri kaminda pa nos por prediká e plan ku tabata skondí tokante Kristu. Pasobra ta pa motibu di e plan ei mes mi ta den prizòn.

⁴Resa pa mi por hasi e plan ei konosí abiertamente, manera mi mester hasi.

⁵Aktua ku sabiduria ora boso ta trata esnan ku no ta kreyente i saka probecho di tur oportunidat.

⁶Laga boso kòmbersashon ta ameno i ku stansha; sòru pa boso tin un kontesta kla pa ken ku puntra algu!

⁷Nos kerido ruman Tígiko, mi asistente fiel i kompañero den trabou pa Señor, lo duna boso tur notisia ku ta toka mi.

⁸Ta pa e motibu ei mi ta mand'é serka boso, pa boso haña sa loke ta pasando ku nos i asina haña kurashi.

⁹Mi ta mand'é serka boso huntu ku Onésimo, nos ruman fiel i stimá, ku ta un di boso. Nan lo konta boso tur kos ku ta pasando aki.

¹⁰Aristargo, ku ta den prizòn huntu ku mi, ta manda kumindamentu pa boso i tambe Marko, primu di Barnabas. Ya boso a haña mi instrukshonnan kon risibí Marko si e mester bini serka boso. Dun'é un bonbiní!

¹¹Hesus, tambe yamá Hustu, tambe ta manda kumindamentu. E tres hòmbernan akí ta e úniko kreyentenan hudiu ku ta traha huntu ku mi pa reino di Dios i nan a konsolá mi hopi.

¹²Kumindamentu di Epafras; e ta un di boso i sirbidó di Kristu-Hesus.[10] Semper e ta resa pa boso ku mashá fervor pa boso para firme komo kreyente madurá ku ta obedesé boluntat di Dios den tur kos.

¹³Mi por sigurá boso ku e ta traha duru pa boso i pa e hendenan na Laodisea i Hierápolis.

¹⁴Lukas, nos kerido dòkter, i ruman Demas tambe ta manda kumindamentu.

¹⁵Kumindamentu pa nos rumannan na Laodisea, nos ruman Nimfa i e iglesia ku ta reuní na su kas.

¹⁶Despues ku boso a lesa e karta akí, sòru pa nan les'é na e iglesia di Laodisea tambe. Anto sòru pa boso tambe lesa esun ku mi a manda pa Laodisea.

¹⁷Bisa Argipo: ‘Mira pa bo kumpli ku e trabou ku bo a tuma riba bo pa sirbi Señor.’

¹⁸Ami mes ta skibi loke ta sigui: Ami, Pablo, ta manda kumindamentu! Kòrda ku mi ta prizonero. Dios su grasia sea ku boso.[11]