Read Papiamento 1 Tesalonisensenan 5 Bible Online

1 Tesalonisensenan 5 - Papiamento bible

1 Tesalonisensenan 5

¹No ta nesesario pa mi skibi boso di e ora ni e tempu ku Señor ta bini bèk,

²pasobra boso sa mashá bon kaba ku dia di Señor ta yega manera ladron den anochi, na e momento ménos sperá.

³Ora hende ta bisando: ‘Tur kos ta trankil i seif,’ diripiente destrukshon lo baha riba nan, manera doló di parto ta kohe un muhé na estado, anto no tin skapatorio!

⁴Pero, rumannan, boso no ta biba den skuridat i e dia ku Señor ta bini lo no sorprendé boso manera un ladron.

⁵Pasobra boso ta yu di lus, hende ku ta biba den klaridat di dia. Nos no ta di anochi ni di skuridat!

⁶P'esei no laga nos drumi manera otro ta hasi, pero laga nos keda lantá i bon na tinu.

⁷Pasobra esnan ku ta drumi, ta drumi anochi! Anto esnan ku ta bebe burachi, ta bebe burachi anochi!

⁸Pero nos ku ta hende ku ta biba den klaridat, laga nos keda bon na tinu. Laga nos bisti fe i amor manera un harnas pa protegé nos i bisti e speransa riba salbashon manera un hèlmu riba nos kabes.

⁹Pasobra Dios no a destiná nos pa haña kastigu, pero pa risibí salbashon pa medio di nos Señor Hesu-Kristu.

¹⁰T'É a muri pa nos, pa nos por biba huntu kunÉ, sea ku nos ta na bida òf den soño di morto.

¹¹P'esei kurashá i yuda otro krese manera boso ta hasi kaba.

¹²Rumannan, nos ke pidi boso duna esnan ku ta traha meimei di boso rekonosementu, esta boso lidernan ku ta instruí boso den asuntu di Señor.

¹³Boso mester apresiá i stima nan mashá hopi mes pa e trabou ku nan ta hasi. Biba na pas ku otro.

¹⁴Nos ke ekshortá boso, rumannan, pa hasi lo siguiente: koregí esnan ku ta indisipliná, kurashá esnan ku ta desanimá, yuda esnan ku ta débil i tene pasenshi ku tur hende.

¹⁵Mira pa niun hende no paga malu ku malu, pero semper buska pa hasi loke ta bon pa e otro rumannan i pa tur hende.

¹⁶Sea semper kontentu;

¹⁷resa kontinuamente;

¹⁸yama Dios danki bou di tur sirkunstansia, pasobra esei ta loke Dios ta deseá di boso komo hende ku ta kere den Kristu.

¹⁹No paga kandela di Spiritu Santu

²⁰ni menospresiá profesia,

²¹saminá tur kos i keda ku loke ta bon,

²²evitá tur sorto di kos malu.

²³Ku Dios mes ku ta e Dios di pas hasi boso kompletamente santu i warda boso spiritu, alma i kurpa, sin mancha, pa binida di nos Señor Hesu-Kristu.

²⁴Dios ku ta yama boso ta fiel i E lo kumpli.

²⁵Rumannan, resa pa nos tambe.

²⁶Kumindá tur e rumannan ku un sunchi santu.

²⁷Mi ta enkargá boso ku outoridat di Señor pa lesa e karta akí pa tur ruman.

²⁸Grasia di nos Señor Hesu-Kristu sea ku boso.