Read Papiamento Yozue 2 Bible Online

Yozue 2 - Papiamento bible

Yozue 2

¹For di Shitim Yozue, yu di Nun, a manda dos spiòn na sekreto bai spioná e pais, prinsipalmente e siudat Yériko. Ora nan a yega aya, nan a bai kas di un muhé di bida yamá Rahab, kaminda nan a keda pasa nochi.

²Ma rei di Yériko a haña notisia ku e atardi ei algun hende hòmber di Israel a bin spioná e pais.

³P'esei rei di Yériko a manda bisa Rahab: ‘Entregá e hòmbernan ku a bini bo kas, pasobra nan a bini pa spioná henter e pais.’

⁴Pero e muhé a skonde e dos hòmbernan i bisa: ‘Enberdat e hòmbernan ei a bishitá mi, pero mi no tabata sa di unda nan a bini.

⁵Nan a bai ora a kuminsá bira skur, nèt promé ku a sera porta di siudat. Unda nan a bai sí, mi no sa. Si boso sali lihé nan tras, ainda boso por alkansá nan.’

⁶Lugá Rahab a laga e hòmbernan subi riba e dak plat i skonde nan bou di poko yerba di vlas[1] ku el a plama ei riba pa seka.

⁷E hòmbernan di rei a persiguí e spiònnan den direkshon di Yordan te na e lugánan kaminda por krusa e riu na pia. Asina e hòmbernan di rei a sali bai, a sera porta di siudat.

⁸Promé ku e spiònnan a bai drumi, Rahab a subi riba dak serka nan.

⁹El a bisa nan: ‘Mi sa ku SEÑOR a duna boso e tera akí; El a pone nos haña miedu di boso. E otro habitantenan di e pais tambe ta tembla di miedu pa boso.

¹⁰Nos a tende ku tempu ku boso a sali for di Egipto, SEÑOR a laga awa di Laman Kòrá seka pa boso pasa. Tambe nos a tende kon na e otro banda di Yordan boso a kaba ku e dos reinan amorita, Sihon i Og.

¹¹Ora nos a tende e kosnan ei, nos kurason a krem i nos a pèrdè tur kurashi pa resistí kontra boso, pasobra SEÑOR, boso Dios, ta Dios tantu ayariba den shelu komo aki bou na tera.

¹²Awor, meskos ku mi a trata boso bon, hura mi pa SEÑOR ku boso tambe lo trata mi famia bon.

¹³Laga mi tata i mi mama, mi ruman hòmber- i muhénan ku tur nan famia keda na bida. E ora ei lo mi tin prueba ku boso ta di konfia i ku boso lo salba nos for di morto.’

¹⁴E hòmbernan a kontest'é: ‘Nos ta pone nos bida komo bòrg, basta bo no reda nos. Ora SEÑOR duna nos e pais akí, nos lo trata bo bon i kumpli ku nos promesa.’

¹⁵Komo Rahab su kas tabata trahá den muraya di siudat, el a laga nan baha ku un kabuya for di bentana,

¹⁶i el a bisa nan: ‘Bai den seru, ya esnan ku ta buska boso no por haña boso. Skonde tres dia aya, te ora nan regresá siudat. Despues boso por sigui boso kaminda.’

¹⁷E hòmbernan a kontestá: ‘Nos lo kumpli ku loke bo a pidi nos hura, basta bo hasi lo siguiente.

¹⁸Ora nos drenta e pais, mara e kordon kòrá akí na e bentana ku bo a laga nos baha for di dje, i tuma bo tata, bo mama, bo rumannan i sobrá famia, den kas serka bo.

¹⁹Si kualke di nan sali riba kaya, ta su mes falta si nan mat'é, e ora ei nos no ta responsabel. Pero si nan mata kualke di esnan ku ta den bo kas, nos lo ta kulpabel.

²⁰Pero si bo reda nos, nos lo no ta mará mas na e huramentu ku bo a pone nos hasi.’

²¹‘Di akuerdo,’ Rahab a rospondé, i el a laga nan bai. Ora nan a bai, Rahab a mara e kordon kòrá na e bentana.

²²E dos hòmbernan a bai den seru i nan a keda tres dia aya. Mientrastantu e persiguidónan a buska nan tur kaminda sin por a haña nan. Al fin e sòldánan a bai Yériko bèk.

²³E ora ei e dos hòmbernan a baha for di seru, krusa Yordan i regresá serka Yozue, yu di Nun. Nan a kont'é tur loke a pasa nan.

²⁴Nan a bisa Yozue: ‘Di bèrdè SEÑOR a entregá henter e pais den nos poder; asta t'asina ku tur e habitantenan di e pais ta tembla di miedu pa nos.’