Read Papiamento Yozue 20 Bible Online

Yozue 20 - Papiamento bible

Yozue 20

¹SEÑOR a bisa Yozue:

²‘Papia ku e israelitanan pa nan skohe siudat di asilo, manera Mi a ordená boso pa medio di Moises.

³Ora un hende mata un otro hende sin e por yuda, sin plania promé, e por hui bai un di e siudatnan ei. Ei e ta haña protekshon kontra e famia mas yegá ku mester venga e morto.

⁴Ora e hende ei hui bai un di e siudatnan ei, e mester splika su kaso na e ansianonan den porta di siudat promé. E ora ei e lidernan akí lo lag'é drenta i nan ta mustr'é un lugá pa e keda biba serka nan.

⁵Si e famia ku mester venga e morto persiguí esun ku a mata, nan no mester entreg'é, pasobra el a mata su próhimo sin a plania promé i sin ku e tabatin odio kontra dje.

⁶E mester keda biba den e siudat ei te ora husga su kaso dilanti di komunidat. Ta te ora e gransaserdote di e tempu ei muri, e por regresá su kas na e siudat, for di kaminda el a hui.’

⁷E israelitanan a skohe: Kèdèsh na Galilea, den e serunan di Naftali; Shikem, den e serunan di Efraim i Kiriat-Arba, esta Hebron, den e serunan di Huda.

⁸Na otro banda di Yordan, ost di Yériko, nan a skohe: Bèsèr, den e desierto riba sabana, den teritorio di tribu di Ruben; Ramot, na Guilead, den teritorio di tribu di Gad i Golan, na Bashan, den teritorio di tribu di Manase.

⁹Eseinan tabata e siudatnan ku e israelitanan a skohe, kaminda un di nan òf un di e strañeronan ku tabata biba serka nan por a hui bai, den kaso ku e mata un hende sin por yuda. Einan e famia ku mester venga e morto no por hañ'é pa mata promé ku husga su kaso dilanti di e komunidat.