Read Papiamento 1 Timoteo 1 Bible Online

1 Timoteo 1 - Papiamento bible

1 Timoteo 1

¹Esaki ta karta di Pablo, apòstel di Kristu-Hesus, riba òrdu di Dios, nos Salbador, i Kristu-Hesus, nos Speransa.

²E karta akí ta pa Timoteo, mi yu berdadero den fe. Dios Tata i nos Señor Kristu-Hesus duna bo grasia, mizerikòrdia, i pas.

³Manera mi a pidi bo kaba ora mi a sali pa region di Masedonia, keda na Éfese. Tin algun hende einan ku ta instruí doktrina falsu. Duna òrdu pa nan stòp di hasi esei!

⁴Anto bisa nan tambe pa no sigui atendé ku fábulanan i e asuntu di lista infinito di antepasado. E kosnan ei ta trese diskushon i no ta promové e formashon ku Dios ta duna pa medio di fe.

⁵Ma propósito di proklamashon di plan di Dios ta pa promové amor ku ta sali di un kurason puru, un konsenshi limpi, i fe berdadero.

⁶Algun hende a desviá for di e kosnan akí i a kai den diskushon sin pia sin kabes.

⁷Nan ke ta maestro di Lei, kaba nan no ta komprondé ni loke nan mes ta papia, ni tampoko loke nan ta siña otro hende ku tantu siguransa.

⁸Nos sí sa ku Lei ta bon, si us'é manera mester us'é!

⁹Kòrda ku Lei no ta pa hende ku ta biba bon, pero pa esnan ku ta rebelde, desobedesidu, ku ta biba sin Dios, pa pekadónan i hendenan ku ta despresiá i profaná tur loke ta sagrado, pa esnan ku ta mata nan tata i mama, pa asesino,

¹⁰hende hòmber ku ta kometé inmoralidat seksual ku hende muhé, i hende hòmber ku ta drumi ku hende hòmber, trafikante di katibu, gañadó, esnan ku ta hura falsu òf ku ta hasi tur loke ta kontra doktrina sano.

¹¹E doktrina ei ta kuadra ku e bon notisia glorioso ku Dios, bendishoná sea su nòmber, a konfia na mi.

¹²Mi ta gradisí Kristu-Hesus, nos Señor, ku a duna mi forsa; E t'Esun ku a konfia mi i nombra mi pa sirbiÉ,

¹³ounke den pasado mi tabata papia malu di djE, persiguiÉ i insult'É. Pero Dios a tene mizerikòrdia ku mi, pasobra ami, ku e tempu ei no tabata un kreyente, no tabata sa kiko mi tabata hasi.

¹⁴I nos Señor a drama su grasia abundantemente riba mi i a duna mi fe i amor di kua Kristu ta e fuente.

¹⁵E palabranan ku ta sigui ta konfiabel i ta meresé aseptashon kompleto: Kristu-Hesus a bini na mundu pa salba pekadónan. I ami ta esun di mas grandi!

¹⁶Pero Dios a tene mizerikòrdia ku mi: Kristu Hesus a mustra ami, e pekadó di mas grandi, su pasenshi sin límite komo ehèmpel pa tur esnan ku despues lo bin kere den djE i risibí bida eterno.

¹⁷Honor i gloria na e Rei di tur siglo, na e Dios inmortal, invisibel i úniko! Amèn.

¹⁸Timoteo, mi yu, mi ta konfia bo ku e enkargo ku mi a duna bo, konforme ku loke bo a tende den e profesianan ku bo a yega di haña. Laga e profesianan ei ta un yudansa pa bo den lucha pa e bon kousa,

¹⁹armá ku fe i ku un konsenshi limpi. Algun hende ku no a skucha nan konsenshi a frakasá den nan fe.

²⁰Den nan bo ta haña hende manera Himeneo i Alexander. Mi a entregá nan den man di satanas pa siña nan no blasfemá.