Read Papiamento 1 Timoteo 2 Bible Online

1 Timoteo 2 - Papiamento bible

1 Timoteo 2

¹Promé ku tur kos mi ta hasi un apelashon serio na e kreyentenan pa ofresé súplika, orashon, interseshon i gradisimentu na Dios pa tur hende.

²Mester resa pa esnan ku tin outoridat supremo i pa esnan prominente, ya[1] nos por biba un bida ketu i trankil, yen di rèspèt pa Dios i rèspèt pa hende.

³Orashon asina ta bon i aseptabel den bista di Dios, nos Salbador,

⁴ku ke pa tur hende haña salbashon i yega na konosementu di e bèrdat:

⁵Ta ún Dios so tin i ún Mediador entre Dios i nos, esta e hende, Kristu-Hesus;

⁶El a entregá su bida pa reskatá humanidat. Asina su morto a testiguá, na su debido tempu, ku Dios ke salba hende.

⁷I El a nombra mi komo mensahero i apòstel pa anunsiá esei i siña esnan no hudiu tokante fe i bèrdat! No ta gaña mi ta gaña, ta bèrdat mi ta papia.

⁸Mi ke pa tur kaminda ku ta hasi orashon hende hòmber, konsagrá na Dios, alsa nan man den orashon, sin ku nan paden ta karga rabia òf ta kunsumí.

⁹Meskos tambe hende muhé mester bisti paña desente, simpel i apropiá, sin kuenta di flèktu òf peña kabei ku adorno di oro, bisti pèrla òf paña karu.

¹⁰Nan adorno mester ta nan bon obranan, digno di hende muhé ku ke mustra bon kla ku nan ta dediká na Dios.

¹¹Hende muhé mester keda ketu ora ta siña nan; nan mester ta kompletamente sumiso.

¹²Mi no ta pèrmití hende muhé duna siñansa ni tin outoridat riba hende hòmber; nan mester keda ketu.

¹³Pasobra Dios a krea Adam promé i despues Eva.

¹⁴Anto no ta Adam ta esun engañá; ta e muhé ta keda engañá i t'é a desobedesé palabra di Dios.

¹⁵Pero hende muhé lo keda salbá pa medio di hañamentu di yu, si nan sigui ku sano huisio den fe, amor i un bida santu.