Read Papiamento 2 Timoteo 3 Bible Online

2 Timoteo 3 - Papiamento bible

2 Timoteo 3

¹Sa ku den e último dianan lo bini temporada difísil,

²pasobra hende lo stima nan mes mas ku tur kos. Nan lo ta golos pa plaka, bromadó i arogante; nan lo blasfemá Dios, desobedesé nan mayornan i nan lo ta malagradesido. Nan lo no respetá loke ta di Dios;

³nan lo no tin kariño i nan lo no ke sera pas ku otro. Nan lo ta hasidó di redu, hende ku no por kontrolá nan mes, hende violento ku ta odia loke ta bon.

⁴Nan lo traishoná otro i hasi kos pa loko. Nan lo ta hende hinchá di orguyo, ku ta stima plaser mas ku nan ta stima Dios.

⁵Nan lo hasi manera nan ta mashá ku Dios, kaba nan a nenga e poder real di fe kristian. Keda leu for di hende asina,

⁶pasobra algun di nan ta slùip drenta kas i manipulá e damsnan débil ku ta hoga den piká i ku ta laga tur sorto di mal deseo lastra nan.

⁷E muhénan ei ta hende ku ta kana buska kos di siña konstantemente, sin nunka yega na un konosementu real di bèrdat.

⁸Meskos ku Yanes i Yambre a bai kontra Moises, asina e siñadónan falsu akí ta rechasá bèrdat. Nan ta hende mente korumpí ku a frakasá den fe.

⁹Pero nan lo no yega leu, pasobra tur hende lo nota ku nan ta bobo meskos ku e dosnan ku a bai kontra Moises.

¹⁰Pero abo sí a sigui loke mi a siña bo, mi manera di biba, mi meta den bida, mi fe, mi pasenshi, mi amor i mi perseveransia.

¹¹Bo a tuma parti den mi persekushon i den e sufrimentunan ku mi mester a wanta na Antiokia, Ikonio i Listra. — Anto esta hopi persekushon mi a haña mi aden! — Pero Señor a liberá mi di tur e kosnan ei!

¹²Ta asina bèrdè, tur hende ku ke hiba un bida dediká na Dios i den union ku Kristu-Hesus, lo haña nan ku persekushon,

¹³i hende malbado i gañadó lo bira dia pa dia pió. Nan lo sigui gaña hende i hende lo sigui gaña nan.

¹⁴Pero abo, sigui loke bo a siña i ta konvensí di dje, pasobra bo sa ta ken a siña bo.

¹⁵Ademas kòrda tambe ku abo konosé Skritura Sagrado fo'i chikí; Skritura por instruí bo i duna bo e sabiduria ku ta hiba na salbashon pa medio di fe den Kristu-Hesus.

¹⁶Henter Skritura ta inspirá pa Dios i ta útil pa duna siñansa, refutá, koregí i pa instruí kon biba un bida rekto,

¹⁷di manera ku e hende ku ta sirbi Dios, por ta kualifiká i bon prepará pa hasi tur sorto di bon obra.