Read Papiamento 2 Timoteo 4 Bible Online

2 Timoteo 4 - Papiamento bible

2 Timoteo 4

¹Solemnemente mi ta pidi bo dilanti di Dios i Kristu-Hesus, Esun ku ta bai husga bibu i morto, mi ta pidi bo, pasobra Kristu-Hesus ta bini bèk komo rei:

²prediká e palabra, insistí ku mester proklam'é na momento oportuno i inoportuno, ku tur pasenshi ku instrukshon ta eksigí, konvensé, koregí i kurashá hende.

³Pasobra lo yega un tempu ku hende no ke aseptá doktrina sano mas. Nan lo sigui nan mal deseonan i montoná maestro ku ta papia pa karisiá nan orea.

⁴Nan lo tapa orea pa bèrdat pa skucha fábula.

⁵Pero abo sí, dominá bo mes bou di tur sirkunstansia; soportá sufrimentu, hasi trabou di predikadó di e bon notisia i kumpli ku bo deber komo sirbidó di Dios.

⁶Pa loke ta trata ami, ya e momento a yega ku mi sanger lo drama komo un sakrifisio na Dios; mi ora di muri ta tras di porta.

⁷Mi a lucha e bon lucha, mi a kore e kareda te na fin i mi a mantené mi fe.

⁸No a keda mi nada mas awor ku risibí e korona di hustisia ku Señor, e hues hustu, lo duna mi dia E bini bèk. No solamente ami, pero tur ku ta ward'É bini atrobe ku un deseo fervoroso.

⁹Hasi tur bo posibel pa bo bini pronto serka mi,

¹⁰pasobra Demas, mi kolaboradó, a bandoná mi, komo ku e tabata gusta kos di mundu. El a baha bai Tesalónika. Kreses a bai Galasia i Tito a bai Dalmasia.

¹¹Ta Lukas so ta aki huntu ku mi. Buska Marko i tres'é ora bo bini; mi por hasi bon uso di su yudansa.

¹²Mi a manda Tígiko bai Éfese.

¹³Ora bo bini, bini ku e kapa ku mi a laga serka Karpo na Troas; trese e ròlnan di buki tambe pa mi, spesialmente esunnan di kueru.

¹⁴Alexander, e platé ku ta traha ku koper, a hasi mi hopi daño; Señor lo dun'é su pago meresí!

¹⁵Abo tambe tene kuidou kuné; el a bai fuertemente kontra loke nos a bisa.

¹⁶Niun hende no a sostené mi e promé be ku mi mester a defendé mi kurpa den korte, al kontrario tur hende a laga mi na kaya! Mare Dios no tuma esei na kuenta!

¹⁷Pero Señor a sostené mi i a duna mi forsa pa asina mi por a prediká e bon notisia sin kita sin pone i tur pueblo no hudiu por a tend'é. Ademas El a libra mi di boka di leon!

¹⁸Dios lo libra mi di tur atake malbado i hiba mi su reino selestial sano i salvo. Gloria n'E den tur eternidat! Amèn.

¹⁹Kumindamentu pa Priskila i Akila i pa famia di Onesiforo.

²⁰Erasto a keda na Korinte i mi a laga Trófimo malu na Mileto.

²¹Hasi lihé pa bo bini promé ku wenter kuminsá. Kumindamentu di Eubulo, Pudens, Lino, Klaudia i tur e otro rumannan.

²²Señor sea ku bo den profundidat di bo ser; su grasia sea ku boso tur!