Read Papiamento Filemon 1 Bible Online

Filemon 1 - Papiamento bible

Filemon 1

¹Esaki ta un karta di Pablo, prizonero pa kousa di Kristu-Hesus, i di ruman Timoteo pa Filemon, nos kerido kompañero di trabou,

²i pa e iglesia ku ta reuní na su kas. E karta akí ta bai tambe pa nos ruman muhé Apfia[1] i pa Argipo, nos kompañero den lucha.

³Dios nos Tata i Señor Hesu-Kristu duna boso grasia i pas.

⁴Mi ta gradisí mi Dios, kada be ku mi kòrda riba bo den mi orashonnan,

⁵pasobra mi a tende kuantu fe bo tin den Señor Hesus i kuantu stimashon bo tin pa Dios su pueblo.

⁶Mi ta resa, pa e fe ku bo ta kompartí ku e otro kreyentenan, hiba bo na un komprondementu berdadero di tur e kosnan bon ku nos[2] por hasi pa Kristu.

⁷Mi ruman, bo amor a hasi mi mashá kontentu i a kurashá mi hopi, pasobra el a sirbi pa animá kurason di e rumannan.

⁸P'esei, ounke apelando na Kristu mi tin derecho di bisa bo kiko bo mester hasi,

⁹tòg mi ta preferá di hasi un petishon na bo a base di amor. I mi ta hasi e petishon ei komo Pablo, un hòmber bieu kaba i asta prezu awor akí pa kousa di Kristu-Hesus.

¹⁰Mi ke pidi bo pa mi yu Onésimo; ta den prizòn mi a bira su tata spiritual.

¹¹Un tempu e no tabata sirbi bo pa nada, pero awor el a bira útil pa nos tur dos.

¹²Mi ta mand'é bèk pa bo i ta manera ta mi kurason mes mi ta saka manda pa bo![3]

¹³Lo mi tabatin gana di ten'é serka mi pa e por a yuda mi na bo lugá, tanten mi ta prezu pa kousa di e bon notisia.

¹⁴Sinembargo mi no ke hasi nada sin bo aprobashon, pa bo no haña bo ta hasi un bondat fòrsá, ma di e manera akí bo por hasié di bo mes boluntat.

¹⁵Por ta mashá bon ku ta pa un tempu el a alehá for di bo, djis pa bo hañ'é bèk pa semper.

¹⁶Pasobra awor e no ta djis un simpel katibu: mas ku un katibu e ta un ruman stimá. Anto spesialmente pa mi, e ta mashá stimá! Pero pa abo e mester ta mas stimá ainda, komo katibu i komo ruman den Señor.

¹⁷Ke men si bo tin mi pa kompañero, risibí Onésimo manera lo bo a risibí mi mes.

¹⁸Si el a perhudiká bo den ki forma ku ta òf si e ta debe bo algu, laga esei pa mi kuenta.

¹⁹Awor mi mes man ta skibi esaki: ‘Ami, Pablo, ta paga bo bèk!’ Klaro ku no ta nesesario pa mi kòrda bo ku bo tin un debe serka mi, esta bo mes!

²⁰Sí, mi ruman, hasi mi e fabor akí pa Señor; animá mi kurason komo ruman den Kristu!

²¹Mi ta skibi bo ku konfiansa ku bo ta skucha mi. Mi sa ku lo bo hasi muchu mas tantu ku loke mi ta pidi bo.

²²Tambe ta bini aserka ku bo mester prepará un lugá pa mi keda, pasobra mi ta spera ku Dios lo skucha boso orashonnan i entregá mi bèk na boso.

²³Kumindamentu di Epafras, ku ta prizonero huntu ku mi pa kousa di Kristu-Hesus.

²⁴Kumindamentu di mi kolaboradónan Marko, Aristargo, Demas i Lukas.

²⁵Grasia di Señor[4] Hesu-Kristu sea ku boso.[5]