Read Papiamento Hebreonan 11 Bible Online

Hebreonan 11 - Papiamento bible

Hebreonan 11

¹Fe ke men ku nos ta sigur di e kosnan ku nos ta spera di risibí i ku nos ta konvensé di e realidat ku nos no ta mira.[9]

²Debí na tal fe Dios a duna bon testimonio di hende di ántes.

³Pasobra nos tin fe, nos ta komprondé ku Dios a krea universo pa medio di su palabra: ke men ku loke nos por mira a nase for di loke nos no por mira.

⁴Pasobra Abel tabatin fe, el a ofresé Dios un mihó sakrifisio ku Kain a ofresé. Pa motibu di su fe Dios a deklará ku Abel tabata hustu i Dios a aseptá su sakrifisionan. Pa medio di su fe Abel ta papia awor akí ainda, maske el a muri kaba.

⁵Pasobra Henok tabatin fe, Dios a kit'é for di e bida akí promé ku el a muri. No por a hañ'é mas, pasobra Dios a tum'é serka djE. Skritura ta bisa ku, promé ku Dios a tum'é serka djE, e tabata biba segun boluntat di Dios.

⁶Si un hende no ta kere den Dios, ta imposibel pa e hasi loke Dios ke. Pasobra es ku ke bai serka Dios, mester kere ku E ta eksistí i ku E ta rekompensá esnan ku ta busk'É.

⁷Pasobra Noe tabatin fe, el a tuma Dios na serio, ora El a atvertié pa kos ku ainda no por a mira. El a konstruí un arka pa salba su famia. Su bida di fe a kondená e otro hendenan riba mundu, pero a pone ku Dios a aseptá é komo hustu.

⁸Pasobra Abraham tabatin fe, el a obedesé ora Dios a yam'é: el a sali bai un pais ku Dios a destiná p'e i su desendensia. El a sali bai sin sa unda e tabata bai.

⁹I pa medio di e fe ku e tabatin, el a biba komo strañero na e pais ku Dios a primintié. El a biba den tènt, meskos ku Isak i Yakob, ku tambe a haña e promesa ei.

¹⁰Pasobra Abraham tabata anhelá e siudat ku un fundeshi firme, di kual Dios mes tabata e arkitekto i konstruktor.

¹¹Pasobra Abraham tabatin fe, Dios a hasié kapas di engendrá un yu serka Sara, ounke e tabata bieu i Sara no por a konsebí.[10] Pasobra e tabata konfia ku Dios lo a kumpli ku su promesa.

¹²P'esei tambe ésun hòmber ei, ku tabata yegando na fin di su bida, a haña desendiente, mes numeroso ku strea na shelu, inkontabel manera pipita di santu na playa di laman.

¹³Den fe nan tur a muri sin haña loke Dios a primintí nan. Pero esei nan a mira for djaleu i nan a keda kontentu kuné. Nan a rekonosé ku na mundu nan tabata strañero i habitante pasahero.

¹⁴Esnan ku ta papia asina, ta duna bon kla di konosé ku nan ta en buska di un patria.

¹⁵Si nan a sinti nostalgia pa e pais ku nan a bandoná, nan por a bolbe fásilmente.

¹⁶Pero nan tabata anhelá un mihó patria, esun selestial. P'esei Dios no ta sinti bèrgwensa di ta yamá nan Dios; pasobra ta pa nan El a konstruí un siudat.

¹⁷Pasobra Abraham tabatin fe, el a ofresé Isak komo sakrifisio ora Dios a pon'é na prueba. E tabata dispuesto pa ofresé su úniko yu komo sakrifisio, ounke Dios a hasié un promesa:

¹⁸‘Dor di Isak bo ta haña e desendientenan ku Mi a primintí.’

¹⁹Abraham a pensa ku Dios tabatin asta poder pa laga morto resusitá; p'esei el a haña su yu hòmber bèk, loke tabata un prefigurashon di e kosnan benidero.

²⁰Pasobra Isak tabatin fe, el a duna Yakob i Esou un bendishon relashoná ku futuro.

²¹Pasobra Yakob tabatin fe, el a bendishoná e dos yunan di Jozef na su kama di morto. I ilèn riba su bastòn, el a adorá Dios.

²²Pasobra Jozef tabatin fe, el a papia na fin di su bida di e salida di e israelitanan for di Egipto i a duna instrukshon tokante su restunan mortal.

²³Pasobra e mayornan di Moises tabatin fe, nan a skond'é tres luna largu despues di su nasementu, pasobra nan a mira ku e tabata un yuchi bunita. Nan no tabatin miedu di e òrdu di rei.

²⁴Pasobra Moises tabatin fe, el a nenga, dia el a bira grandi, di pasa pa yu di e yu muhé di fárao.

²⁵El a preferá di haña maltrato huntu ku e pueblo di Dios na lugá di gosa di plaser di piká pa un ratu so.

²⁶P'e e deshonra ku Kristu mester a pasa, tabata un rikesa mas grandi ku e tesoronan di Egipto. E tabata fiha su bista riba e rekompensa di den futuro.

²⁷Pasobra e tabatin fe, el a sali bai for di Egipto sin tabatin miedu di rei. El a perseverá, manera un hende ku tabata mira e Dios invisibel.

²⁸Pasobra e tabatin fe, el a instituí fiesta di Pésag i a laga hunta sanger na kozein di porta, di manera ku e angel di morto lo no a mata e yu mayónan di e famianan di Israel.

²⁹Pasobra e israelitanan tabatin fe, nan a pasa dor di Laman Kòrá komo si fuera tabata tera seku; ora e egipsionan a purba, nan a hoga.

³⁰Pasobra e israelitanan tabatin fe, e murayanan di Yériko a basha aden, despues ku e israelitanan a kana shete dia largu rondó di nan.

³¹Pasobra e prostituta Rahab tabatin fe, el a risibí e spiònnan kariñosamente i e no a muri huntu ku esnan ku tabata desobedesidu na Dios.

³²I kiko mas mi mester menshoná? Mi no tin tempu pa para konta di Gideon, Barak, Samson i Yefta, di David i Samuel i e profetanan.

³³Pasobra nan tabatin fe, nan a konkistá reino, mantené derecho i risibí loke Dios a primintí; nan a sera boka di leon,

³⁴paga kandela grandi i a skapa di morto pa spada; nan debilidat a bira forsa, nan a bira fuerte den guera i a pone ehérsito enemigu hui.

³⁵Muhé a haña nan famianan bèk, resusitá for di morto. Otro a muri despues di a torturá nan; nan a nenga libertat pa por resusitá den un bida mihó.

³⁶Otro a soportá chèrchè i bòftá, asta soportá bui i prizòn.

³⁷A piedra nan, zag nan na dos[11] i mata nan ku spada. Nan a dualu rònt, bistí na lana di karné i kueru di kabritu. Nan tabata pasa mizeria, keda persiguí i maltratá.

³⁸Nan tabata muchu bon pa e mundu akí! Nan tabata dualu den desierto i seru, i tabata biba den spelònk i buraku.

³⁹Ounke Dios ta duna bon testimonio di tur e hendenan akí, nan no a risibí loke El a primintí.

⁴⁰E tabatin un mihó plan ku nos i E no tabata ke pa nan a yega na perfekshon sin ku nos yega.