Read Papiamento Hebreonan 12 Bible Online

Hebreonan 12 - Papiamento bible

Hebreonan 12

¹P'esei nos, rondoná di un multitut asina grandi di hende ku a demostrá nan fe, mester benta tur peso, esta, e pikánan ku ta molestiá nos asina fásil, un banda, i partisipá ku perseveransia na e kareda ku nos tin nos dilanti.

²Laga nos tene nos bista fihá riba Hesus, ku a bai nos dilanti riba e kaminda di fe i ku lo hiba nos tambe na final di e kaminda. Hesus a sufri na krus, sin a sinti bèrgwensa di e morto akí, pasobra E tabata sa ku despues di e sufrimentu akí lo El a haña alegria; i awor E ta sintá na man drechi di trono di Dios.

³Meditá riba Esun ku mester a soportá tantu resistensia di pekadó; ya boso lo no kansa ni desanimá.

⁴Den boso lucha kontra piká, boso no tabatin nodi ainda di lucha te na morto.

⁵Ya boso a lubidá loke Dios a bisa boso, su yunan, pa kurashá boso. Den Skritura E ta bisa: ‘Mi yu, no despresiá korekshon ku bini di Señor, i no pèrdè kurashi ora E kastigá bo.

⁶Pasobra Señor ta koregí esun ku E ta stima, E ta kastigá tur esnan ku E ta aseptá komo yu.’

⁷Soportá loke boso ta sufri, komo korekshon: Dios ta trata boso manera yu.

⁸Si Dios no koregí boso manera e otro yunan, boso no ta su yu di bèrdat.

⁹Ademas, tempu nos tabata mucha, nos mayornan aki na mundu a koregí nos i nos tabata respetá nan. Pakiko no someté nos ku mas rason na nos Tata selestial pa haña bida?

¹⁰Nos mayornan aki na mundu a koregí nos durante e bida kòrtiku akí, segun a parse nan mas kumbiniente; pero Dios ta koregí nos pa nos berdadero probecho, pa hasi nos santu manera E.

¹¹Na e momento ku un hende ta haña kastigu, e no ta gusta; al kontrario, e kastigu ta hasié tristu. Pero esnan ku a keda formá dor di e kastigu, despues lo disfrutá di su fruta, esta pas, pasobra nan ta biba di akuerdo ku boluntat di Dios.

¹²Hisa bo mannan slap anto i rèk bo rudianan tembloroso.

¹³Kana riba kaminda règt; e ora ei loke ta lam lo no sali for di lugá, pero kura.

¹⁴Hasi esfuerso pa biba na pas ku tur hende i trata di biba santu. Es ku no biba santu, no ta mira Señor nunka.

¹⁵Tene kuidou pa ningun hende no bira lomba pa grasia di Dios. Tene kuidou pa amargura no krese manera yerba shimaron, kousa inkietut i venená henter komunidat.

¹⁶Tene kuidou pa niun hende no kometé inmoralidat seksual ni ta indiferente pa kosnan sagrado, manera Esou, ku pa un solo kuminda a bende su derechonan di yu mayó.

¹⁷Despues di tempu e ker a haña bendishon di su tata tòg, pero e ora ei a rechas'é. E no a haña un manera pa kambia loke el a hasi, ounke el a busk'é ku awa na wowo.

¹⁸Boso no a yega, manera e israelitanan, un seru ku boso por a mishi kuné, un seru tur na kandela, yen di skuridat, tiniebla i tempestat,

¹⁹kaminda zonido di tròmpèt i stèm di Dios tabata resoná. Esnan ku a tende e stèm, a roga pa E no papia mas ku nan.

²⁰Pasobra nan no por a soportá e òrdu: Mester piedra asta un bestia ku mishi ku e seru.

²¹I loke nan a mira tabata asina teribel, ku Moises a grita: ‘Mi ta tembla di miedu!’

²²Pero boso a yega seru di Sion i e siudat di Dios bibu, e Herusalèm selestial, ku míles i míles di angel. Boso a yega e reunion festivo

²³i e asamblea di e yunan privilegiá di Dios, ku ta inskribí den shelu. Boso a yega serka Dios, ku ta hues riba tur hende, i serka e spiritunan di hende hustu, ku Dios a hasi perfekto.

²⁴Boso a yega serka Hesus, e Mediador di un aliansa nobo, i serka e sanger ku El a drama, ku ta papia di algu mihó ku e sanger di Abel.

²⁵Tene kuidou pa boso no nenga di skucha Esun ku ta papia ku boso. Esnan ku a nenga di skucha dia Dios a papia ku nan na mundu, no a skapa; muchu ménos chèns di skapa nos tin, si nos bira lomba pa Esun ku ta papia ku nos for di shelu!

²⁶E tempu ei su stèm a pone mundu sakudí, pero awor El a primintí: ‘Lo Mi no laga mundu so sakudí un bia mas, pero shelu tambe.’

²⁷E palabranan ‘un bia mas’ ta mustra ku e kosnan ku por tambaliá, ke men kos ku ta kreá, lo disparsé, di manera ku loke no por tambaliá, lo keda.

²⁸Nos ta haña serka Dios un reino ku no por tambaliá; p'esei laga nos gradisí Dios p'esei i sirbiÉ manera E ke, ku rèspèt i temor.

²⁹Pasobra nos Dios ta un kandela ku ta devorá tur kos.