Read Papiamento Hebreonan 2 Bible Online

Hebreonan 2 - Papiamento bible

Hebreonan 2

¹P'esei nos mester paga mas tantu atenshon na loke nos a tende, pa nos no pèrdè kaminda.

²E palabranan ku Dios a papia pa medio di e angelnan, ya tabata konfiabel, di manera ku kada hende ku tabata aktua kontra nan i no tabata obedesé nan, tabata haña su kastigu meresí.

³Kon nos por keda sin haña kastigu, si nos no paga atenshon na e mensahe di un salbashon grandi asina? Pasobra Señor mes a anunsiá e salbashon ei promé i esnan ku a tende e mensahe akí a konfirmá esei pa nos.

⁴Ademas Dios a konfirmá nan testimonio pa medio di señal, milager i tur sorto di echo poderoso i dor di parti don di Spiritu Santu, tur kos segun su boluntat.

⁵Dios no a someté e mundu futuro, di kua nos ta papiando, na angelnan.

⁶Al kontrario, un kaminda den Skritura ta pará: ‘Kiko hende ta pa Bo kòrda riba dje, kiko e ta pa Bo sinti p'e?

⁷Pa poko tempu Bo a hasié ménos ku e angelnan, Bo a koron'é ku gloria i honor;[1]

⁸tur kos Bo a pone bou di su pia.’ Ku Dios a someté tur kos n'E, ta nifiká, ku E no a hasi eksepshon pa nada. Awor akí nos no ta mira ainda ku tur kos ta someté n'E.

⁹Pero sí nos ta mira Hesus, ku korto tempu a haña un posishon mas abou ku e angelnan, pero ku awor ta koroná ku gloria i honor pa motibu di su morto. Dios, den su bondat, tabata ke pa E lo a muri pa tur hende.

¹⁰Dios, meta final i Kreador di tur kos, ker a laga hopi yu partisipá den su gloria. P'esei tabata kumbiniente ku E lo a hiba Hesus, nan guia riba e kaminda di salbashon, pa medio di sufrimentu na perfekshon.

¹¹Esun ku ta konsagrá hende na Dios, i tur esnan ku El a konsagrá na Dios, tin mesun Tata. P'esei E no ta sinti bèrgwensa pa yama nan su ruman,

¹²ora E bisa Dios: ‘Lo Mi konta mi rumannan di bo Nòmber i alabá Bo den presensia di nan tur.’

¹³Tambe E ta bisa: ‘Lo Mi pone mi konfiansa den Dios.’ I: ‘At'Ami aki ku e yunan ku Dios a duna Mi.’

¹⁴Komo e yunan akí ta hende di karni i wesu, El a bira hende manera nan, pa, medio di su morto, E kaba ku esun ku tabatin poder riba morto, esta diabel.

¹⁵Asina El a liberá esnan, ku pa miedu di morto a biba henter nan bida manera katibu.

¹⁶Pasobra no ta bai E pa e angelnan, pero, manera Skritura ta bisa: pa e desendientenan di Abraham.

¹⁷P'esei E mester a bira den tur sentido pareu na su rumannan, di manera ku E por a bira un gransaserdote mizerikordioso i fiel dilanti di Dios i asina paga pa e pikánan di e pueblo.

¹⁸Komo E mes a pasa den prueba i a sufri, E por yuda tur esnan ku ta pasa den prueba.