Read Papiamento Hebreonan 3 Bible Online

Hebreonan 3 - Papiamento bible

Hebreonan 3

¹P'esei, rumannan, boso ku ta pertenesé na Dios i ku El a yama pa ta di djE, paga bon tinu na Hesus, Apòstel i Gransaserdote di e fe ku nos ta profesá.

²E tabata fiel na Dios ku a nombr'É, meskos ku Moises tambe a kumpli fielmente ku su tarea den henter kas di Dios.

³Pero Hesus ta digno di un honor mas grandi ku Moises, pasobra esun ku ta konstruí un kas meresé mas honor ku e kas mes.

⁴Tur kas ta hende a traha. Pero Esun ku a traha tur kos, ta Dios.

⁵Moises tabata fiel komo sirbidó den henter kas di Dios; asina el a duna testimonio di loke Dios lo a bisa despues.

⁶Pero Kristu ta fiel komo e Yu nombrá riba kas di Dios. I e kas ei ta nos mes, si a lo ménos nos keda tene ku kurashi i konvikshon na loke nos ta spera.[2]

⁷Ta manera Spiritu Santu a bisa antó: ‘Si awe boso tende su stèm,

⁸no sera boso kurason, manera promé aya tempu di e lantamentu, manera e dia ku boso a pone Dios na prueba den desierto,

⁹ora boso grandinan a tenta i proboká Mi, ounke nan a mira mi obranan,

¹⁰kuarenta aña largu. P'esei Mi a rabia ku e pueblo ei i Mi di: “Esta un pueblo solo birá!” Nan no kièr a konosé mi kamindanan.

¹¹P'esei den mi rabia, Mi a hura pa Mi mes: “E lugá di deskanso ku Mi a warda pa nan, hamas i nunka nan lo no drent'é.” ’

¹²Mi rumannan, paga tinu pa ningun di boso, pa medio di un aktitut robes, no bira infiel na Dios bibu i bira lomba p'E.

¹³Pero tanten e ‘awe’ ku Skritura ta menshoná dura, boso mester animá otro tur dia, di manera ku ningun di boso no ta laga piká gañ'é i sera su kurason.

¹⁴Pasobra nos tin parti na Kristu, si nos mantené e konfiansa ku nos tabatin na prinsipio, te na final.

¹⁵Skritura ta bisa: ‘Si awe boso tende su stèm, no sera boso kurason, manera promé ayá tempu di e lantamentu.’

¹⁶Ta ken tabata esnan ku a skucha i rebeldiá? Tabata tur esnan ku bou di guia di Moises a sali for di e pais Egipto.

¹⁷I ku ken Dios tabata rabiá kuarenta aña largu? Tabata ku esnan ku a peka i di kende e kadaver a keda bentá den desierto.

¹⁸Di ken El a hura, ku nan lo no drenta e lugá di deskanso? No tabata di nan, ku a nenga di obedesé?

¹⁹Ta kla, ku nan no por a drenta e lugá di deskanso pasobra nan no tabatin fe.