Read Papiamento Hebreonan 4 Bible Online

Hebreonan 4 - Papiamento bible

Hebreonan 4

¹Dios su promesa pa por drenta su lugá di deskanso, ta konta ketu bai. P'esei ban tene kuidou, pa despues no resultá ku un di boso a keda atras.

²Nos tambe a risibí e bon notisia, meskos ku nan; pero e mensahe ku nan a tende, no a yuda nan, pasobra nan no a kompartí fe di esnan ku a obedesé e mensahe.

³Nos, ku ta kere, sí ta drenta e lugá di deskanso ei, pero nan nò, manera Dios ta bisa: ‘P'esei den mi rabia, Mi a hura pa Mi mes: “E lugá di deskanso ku Mi a warda pa nan, hamas i nunka nan lo no drent'é.” ’ Tòg Dios su trabou tabata kla for di kreashon di mundu,

⁴pasobra un kaminda Skritura ta bisa di e di shete dia: ‘E di shete dia Dios a sosegá di tur su trabou.’

⁵Pero ei nos ta lesa: ‘E lugá di deskanso ku Mi a warda pa nan, hamas i nunka nan lo no drent'é.’

⁶Esnan ku a tende e bon notisia promé, no a drenta e lugá di deskanso antó pa motibu di nan desobediensia, pero ainda e posibilidat pa hende drenta e lugá di deskanso ta keda eksistí.

⁷P'esei Dios ta bolbe fiha un dia, ku yama ‘awe’. Di esei El a bisa hopi tempu despues pa medio di David den e pasashi ku ya a sita: ‘Si boso tende su stèm awe, no sera boso kurason.’

⁸Si Yozue a hiba e pueblo na e lugá di deskanso di Dios, Dios lo no a papia despues mas di un otro dia.

⁹Ke men ku tin un tempu di deskanso ta warda pueblo di Dios ainda, manera Dios a sosegá riba e di shete dia.

¹⁰Pasobra esun ku drenta e lugá di deskanso di Dios, ta sosegá di su trabou, manera Dios a sosegá di djE.

¹¹Ban hasi esfuerso antó pa drenta e lugá di deskanso ei, di manera ku ningun hende no ta muri dor di sigui mal ehèmpel di esnan den desierto, ku no a obedesé.

¹²Pasobra palabra di Dios ta bibu i poderoso. E ta kòrta mas skèrpi ku un spada ku ta kòrta tur dos banda. E ta penetrá te na e punta kaminda alma i spiritu, manteka di wesu i wesu ta mishi ku otro. E ta analisá deseo i pensamentu di hende.

¹³Pa Dios niun kriatura no ta skondí. Dios ta mira tur kos manera nan ta den realidat. T'E nos mester duna kuenta.

¹⁴Laga nos tene duru na e fe ku nos ta profesá. Pasobra nos tin un gransaserdote elevá, esta Hesus, Yu di Dios, ku a drenta shelu yega te serka Dios.

¹⁵Nos tin un gransaserdote ku ta kapas di kompadesé di nos debilidatnan; E mes tabata poné na prueba den tur sentido, presisamente meskos ku nos. Pero E no a peka.

¹⁶Ban aserká Dios su trono, antó ku konfiansa, kaminda por haña grasia, pa E tene mizerikòrdia ku nos i den su bondat yuda nos na ora di nesesidat.