Read Papiamento Hakobo 1 Bible Online

Hakobo 1 - Papiamento bible

Hakobo 1

¹Esaki ta un karta di Hakobo, sirbidó di Dios i di Señor Hesu-Kristu: Mi ta kumindá e diesdos tribunan ku ta plamá rònt mundu.

²Mi rumannan, ora boso konfrontá ki sorto di prueba ku ta, tuma esei komo un oportunidat pa ta kontentu.

³Pasobra manera boso sa kaba, prueba den fe ta siña hende soportá sufrimentu ku fortalesa.

⁴I sòru pa e fortalesa ei hiba boso na madures kompleto i na un bida ireprochabel i pa boso no faya den nada.

⁵Si kualke un di boso falta sabiduria, resa pidi Dios i lo E duna bo e, pasobra Dios ta gusta duna tur hende sin límite, sin tira nada na nan kara.

⁶Pero ora bo ta resa, resa ku fe den Dios, sin niun tiki duda, pasobra esun ku ta duda ta manera ola di laman ku bientu ta supla djaki p'aya.

⁷Un hende asina no mester kere mes ku e ta risibí nada di Señor,

⁸pasobra e ta un hende ku tin awa den un man, kandela den e otro; e no tin un kondukta stabil.

⁹E ruman den fe sin moda mester ta kontentu ku e tin gran balor

¹⁰i esun ku moda mester ta kontentu ku su rikesa no tin niun balor. Pasobra hende riku ta manera flor di mondi ku no ta keda pa largu tempu.

¹¹Ora solo sali ku su kalor sofokante, e ta kima e matanan; e flornan ta marchitá i nan bunitesa ta kaba na nada. Asina un hende riku ta disparsé, atendiendo su negoshinan.

¹²Felis ta e hende ku ta para firme no opstante e pruebanan ku e ta pasa aden. Ora e pasa e pruebanan ku éksito, lo e risibí bida komo premio, un korona ku Dios a primintí esnan ku ta stim'É.

¹³Si un hende ta hañ'é tentá pa prueba, e no mester bisa: ‘Ta Dios mes ta hasi pa mi kai den tentashon,’ pasobra maldat no por tenta Dios, ni Dios mes no ta hasi pa hende kai den tentashon!

¹⁴Pero un hende ta hañ'é den tentashon dor di su mes mal deseonan ku ta sedusié i koutiv'é.

¹⁵E mal deseonan ei ta konsebí piká, anto unabes ku e piká yega na su punto kulminante, e ta pari morto!

¹⁶Mi rumannan stimá, no laga niun hende gaña boso!

¹⁷Tur don perfekto i tur kos bon ku nos risibí ta bini di shelu, di Dios ku ta Kreador di tur e astronan selestial. E sí no ta kambia nunka manera nan; E no ta kambia di posishon, laga nos den sombra di skuridat.

¹⁸Boluntariamente El a duna nos bida nobo pa medio di e mensahe di bèrdat, pa asina nos por tin na manera di bisa e promé lugá den su kreashon.

¹⁹Mi rumannan stimá, tene kuenta ku loke mi a bisa i sea ansioso pa skucha, pero lento na papia i na rabia!

²⁰Pasobra rabiamentu no ta hiba na un bida hustu manera Dios ta deseá.

²¹P'esei antó deshasí di tur sorto di impuresa i di e gran kantidat di maldat den boso bida. Aseptá ku humildat kompleto e palabra ku Dios a planta den boso kurason i ku por salba boso.

²²No gaña boso mes i kere ku djis skucha palabra di Dios ta sufisiente; sea hende ku ta pone e mensahe den práktika!

²³Esun ku ta djis skucha e palabra di Dios sin kumpli kuné, ta manera un hende ku despues di wak su mes kara den spil,

²⁴ta kita bai i lubidá ki sorto di aparensia e tin!

²⁵Sinembargo esun ku no lubidá loke el a tende, pero ta kumpli ku i fiha su bista riba e lei perfekto ku ta duna libertat, ta haña bendishon di Dios den loke e ta hasi.

²⁶Si un hende ta kere ku e ta mashá dediká na Dios, pero e no por frena su lenga, e ta gaña su mes i su dedikashon no ta sirbi pa nada.

²⁷Ata aki loke Dios Tata ta konsiderá dedikashon puru i ireprochabel: buska drechi di e wérfano i biuda ku ta pasa trafat, i wak pa maldat di e mundu akí no susha bo.