Read Papiamento Hakobo 3 Bible Online

Hakobo 3 - Papiamento bible

Hakobo 3

¹Mi rumannan, mira pa no ta boso tur ke bira maestro, pasobra manera boso mes sa, lo husga nos ku ta maestro mas severo ku e otronan.

²Nos tur ta kometé tur sorto di fayo. E hende ku no ta faya den loke e ta bisa ta un hende madurá, kapas di dominá henter su kurpa.

³Ora nos pone frena den boka di kabai pa e obedesé, nos por kontrolá henter kurpa di e kabai, hib'é kaminda nos ke.

⁴Mira e barkunan; nan ta asina grandi i bientu fuerte ta pusha nan, sinembargo ku un timon asina chikitu por nabegá nan i hiba nan kaminda e stürman ke.

⁵Esei tambe ta e kaso ku lenga di hende; e ta un parti chikitu di kurpa, pero ta broma ku hazaña grandi. Mira kon un chispa asina chikitu por sende un mondi asina grandi na kandela.

⁶Wèl, lenga di hende ta manera chispa! Tin un mundu di maldat skondí tras di dje; e ta e parti ku ta kontaminá nos kurpa kompletamente. E ta sende henter kurso di nos eksistensia na kandela; anto e mes, ta fièrnu ta send'é!

⁷Hende por i a hasi tur sorto di kriatura mansu, animal feros, para, bestia ku ta lastra abou i esnan di laman.

⁸Pero lenga sí nunka niun hende no por a dominá; lenga ta malbado, inkontrolabel i yená ku venenu mortal.

⁹Nos ta us'é pa alabá nos Señor i Tata, i tambe pa maldishoná hende, ku ta kreá segun imágen di Dios.

¹⁰Palabra di alabansa i di maldishon ta brota for di e mesun boka; rumannan, esei no por!

¹¹Awa dushi ku awa brak pareu no ta brota for di e mesun bròn tòg?

¹²Mi rumannan, meskos ku palu di figo no por pari oleifi òf mata di wendrùif no por pari figo, asina bròn di awa brak tampoko no por produsí awa dushi. N' ta asina?

¹³Kua di boso tin sabiduria i komprondementu? Lag'é demostrá esei pa medio di su bon kondukta i obranan ku ta mustra e humildat ku sabiduria ta duna.

¹⁴Pero ora envidia amargá boso kurason i aktua motivá pa ambishon egoista, no kana broma ku boso tin sabiduria i asina peka kontra bèrdat.

¹⁵E tipo di sabiduria ei no ta bini di Dios. E ta pertenesé na mundu; e no ta spiritual i ta bini di demoño.

¹⁶Kaminda tin hende ta envidiá otro i ta aktua motivá pa ambishon egoista, tin desòrdu i tur sorto di maldat.

¹⁷Esnan ku tin e sabiduria ku ta bini di Dios, na promé lugá ta hiba un bida puru. Tambe nan ta hende ku ta trese pas, hende amabel, habrí pa tende, yená ku kompashon, sin prehuisio òf hipokresia, i nan ta produsí un kosecha di bon obra.

¹⁸Hende di pas ta sembra pas promé, pa despues nan kosechá su frutanan, esta un kondukta ku ta agradá Dios.