Read Papiamento Huesnan 12 Bible Online

Huesnan 12 - Papiamento bible

Huesnan 12

¹Tribu di Efraim a reuní, krusa Yordan i bai Safon. Nan a bisa Yefta: ‘Di kon bo a sali bai bringa kontra e amonitanan sin yama nos bin yuda bo? Awor nos ta bai kima bo kas ku bo aden!’

²Pero Yefta a kontestá nan: ‘Ami i mi pueblo tabatin problema grandi ku e amonitanan. Mi a yama boso pero boso no a hasi nada pa salba nos.

³Ora mi a ripará ku boso no ta bin yuda, mi mes a riska mi bida i ataká e amonitanan. SEÑOR a entregá nan den mi poder. Pakiko boso a bin bringa ku mi awor?’

⁴E ora ei Yefta a reuní tur e hòmbernan di Guilead i nan a bringa kontra Efraim. E hòmbernan di Guilead a derotá tribu di Efraim. Un tempu tribu di Efraim a laga sa: ‘Boso, habitantenan di Guilead, no ta nada mas ku poko hòmber di Efraim, ku a bandoná nan tribu.’ Region di Guilead ta keda meimei di Efraim i Manase.

⁵Guilead a okupá e lugánan kaminda por krusa Yordan pa bai Efraim. Ki ora ku un hòmber di Efraim hui bini bin puntra si e tabatin mag di krusa, e guileaditanan tabata puntr'é si ta efraimita e ta. Si el a bisa nò,

⁶nan tabata mand'é: ‘Bisa: shebolèt!’ Si e no por a pronunsi'é bon i el a bisa: ‘Sebolèt!’, nan tabata gar'é i mat'é einan mes. Den e tempu ei 42.000 hòmber di Efraim a muri.

⁷Yefta tabata hues di Israel durante seis aña. Dia el a muri, nan a der'é den su stat na Guilead.

⁸Despues di Yefta, Ibsan di Betlehèm a bira hues di Israel.

⁹E tabatin trinta yu hòmber i tambe trinta yu muhé. El a kasa su trinta yu muhénan ku hende di otro famia i el a buska trinta mucha muhé di otro famia pa e kasa su yu hòmbernan kuné. El a goberná Israel shete aña.

¹⁰Dia el a muri, nan a der'é na Betlehèm.

¹¹Despues di Ibsan, Elon di Zebulon a bira hues. El a goberná Israel dies aña.

¹²Dia el a muri, nan a der'é na Ayalon, den region di Zebulon.

¹³Despues di Elon, Abdon, yu di Hilel, a bira hues di Israel. Abdon a nase na Piraton.

¹⁴E tabatin kuarenta yu hòmber i trinta ñetu. Tur setenta tabata kore riba buriku machu. Abdon a goberná Israel durante ocho aña.

¹⁵Dia Abdon, yu di Hilel, a muri, nan a der'é na Piraton, den teritorio di Efraim, den e serunan kaminda e amalekitanan tabata biba.