Read Papiamento Huesnan 17 Bible Online

Huesnan 17 - Papiamento bible

Huesnan 17

¹Den e serunan di Efraim tabata biba un hòmber yamá Mikas.

²El a bisa su mama: ‘Dia nan a hòrta 1100 plaka di plata for di bo, mi mes a tende bo maldishoná e ladron. T'ami tin e plata ei; ta ami a hòrt'é!’ Su mama a kontestá: ‘SEÑOR bendishoná bo, mi yu.’

³Despues e yu a duna su mama e 1100 plakanan di plata bèk. Ma su mama a bis'é: ‘Pa kita e maldishon ku tin riba bo, mi ta konsagrá e plata na SEÑOR. Ata e plata akí, laga traha un imágen kuné i fur'é ku plata.’

⁴Pero Mikas a debolbé su mama e plata. E ora ei e mama a kohe 200 pida hiba pa un platé ku a traha un imágen i fur'é ku plata. Nan a pone e imágen na kas di Mikas,

⁵kaminda e tabatin un santuario. El a yega di traha algun dios di kas i un efod.[9] Tambe el a konsagrá un di su yunan i hasié saserdote.

⁶Den e tempu ei no tabatin rei na Israel, e hendenan tabata hasi i deshasí.

⁷Na Betlehèm di Huda tabata biba un yònkuman levita ku tabata pertenesé na tribu di Huda. E tabata biba komo strañero einan.

⁸El a sali for di e siudat pa wak si e por a haña un otro kaminda di biba. Na kaminda den e serunan di Efraim el a yega na kas di Mikas.

⁹Mikas a puntr'é: ‘Di unda bo ta?’ El a kontestá: ‘Mi ta un levita di Betlehèm di Huda. Mi ta buska un otro kaminda di biba.’

¹⁰E ora ei Mikas a bis'é: ‘Bin biba aki. Bo por bira pa mi manera un tata i mi saserdote. Fuera di paña i kuminda, mi por duna bo dies plaka di plata pa aña.’

¹¹E levita a disidí di keda serka Mikas. Mikas tabata trata e yònkuman komo si fuera tabata su mes yu.

¹²El a konsagrá e levita i hasié saserdote; e levita a keda biba serka dje.

¹³E ora ei Mikas a pensa: ‘Awor mi ta sigur ku SEÑOR lo manda hopi bendishon pa mi, pasobra mi tin un levita komo saserdote.’