Read Papiamento Huesnan 6 Bible Online

Huesnan 6 - Papiamento bible

Huesnan 6

¹Ma e israelitanan a hasi loke ta malu den bista di SEÑOR. P'esei SEÑOR a entregá nan den poder di e midianitanan durante shete aña.

²E midianitanan tabata oprimí e israelitanan. Komo e israelitanan tabatin hopi miedu di e midianitanan, nan a bai den seru i a traha lugá pa nan skonde den kueba i kaminda no tabata fásil pa hende yega.

³Ki ora ku e israelitanan a sembra, e midianitanan, e amalekitanan i e otro pueblonan di oriente tabata ataká nan.

⁴Nan tabata lanta nan kampamentu den e teritorio di Israel i destruí kosecha te na e region di Gaza. Nan no tabata laga ni karné ni baka ni buriku ni kuminda pa e israelitanan.

⁵Nan tabata bini ku nan tèntnan i nan bestianan. Nan tabata asina tantu ku por a kompará nan ku plaga di dalakochi. No por a konta ni e hendenan ni nan kamelnan. Nan tabata drenta e pais i destruí tur kos.

⁶Pa falta di e midianitanan, e israelitanan a bira mashá pober. Al fin i al kabo nan a sklama na SEÑOR.

⁷Ora e israelitanan a sklama na SEÑOR pa motibu di e midianitanan,

⁸El a manda un profeta pa nan. E profeta a bisa nan: ‘SEÑOR, Dios di Israel, ta bisa: “Mi a saka boso for di Egipto, kaminda boso tabata katibu.

⁹Mi a salba boso for di poder di e egipsionan i di tur ku tabata oprimí boso. Mi a kore ku nan pa boso i a duna boso nan tera.

¹⁰Mi a bisa boso ku t'Ami ta SEÑOR, boso Dios, i ku ounke boso ta biba den pais di e amoritanan awor akí, boso no mester adorá nan diosnan. Ma boso no a hasi kaso.” ’

¹¹Despues Angel di SEÑOR a yega i a bai sinta bou di e palu grandi di ekel na Ofra, propiedat di Yoash. Yoash tabata desendiente di Abiezèr. Gideon, yu di Yoash, tabata bati trigo den e baki di traha biña. E no tabata ke pa e trigo kai den man di e midianitanan.

¹²Angel di SEÑOR a aparesé n'e i a bis'é: ‘SEÑOR ta ku bo; bo ta un hòmber fuerte!’

¹³Gideon a kontestá: ‘No tuma mi na malu, señor, pero si SEÑOR ta ku nos, di kon tur e kosnan akí ta pasa nos? Unda tur e milagernan ku nos antepasadonan a konta nos di dje ta? Nan no a bisa nos ku ta SEÑOR a saka nos for di Egipto? SEÑOR a bandoná nos i a laga e midianitanan oprimí nos.’

¹⁴SEÑOR a hisa kara wak e i bis'é: ‘Usa e forsa ku bo tin pa salba Israel for di e midianitanan. Ami a manda bo.’

¹⁵Pero Gideon a kontestá: ‘Despensá mi atrobe, señor, ma kon mi ta hasi salba Israel? Mi famia ta esun ménos importante den e tribunan di Manase i mi mes ta esun di mas hóben den mi famia.’

¹⁶SEÑOR a rospond'é: ‘Bo por, pasobra Mi ta ku bo. Lo bo derotá e midianitanan komo si fuera ta ún hòmber so nan ta.’

¹⁷E ora ei Gideon a bisa: ‘Bo por ta asina bon anto di duna mi un prueba ku ta Abo, SEÑOR, mes ta papia ku mi?

¹⁸Por fabor, no bai promé ku mi bini bèk ku algu di kome i ofresé Bo esei.’ SEÑOR a sigur'é: ‘Mi ta keda aki te ora bo bini bèk.’

¹⁹Gideon a bai prepará un lamchi di kabritu i ku binti kana di hariña el a traha pan sin zürdeg. Despues el a pone e karni den un makutu i e sous den un wea. El a bai bèk bou di e palu i a ofresé Angel di SEÑOR e kuminda.

²⁰El a bisa Gideon: ‘Pone e karni i e pan riba e baranka akí i basha e sous riba nan.’ Gideon a obedesé.

²¹Angel di SEÑOR a kohe su staf i ku e punta El a mishi ku e karni i e pan. Kandela a sali for di e baranka i a kima e karni i e pan. Despues Angel di SEÑOR a disparsé.

²²Spantá Gideon a bin komprondé ku ta Angel di SEÑOR mes tabata serka dje i el a bisa: ‘Ai, SEÑOR, mi Dios! Mi a topa Angel di SEÑOR kara kara.’

²³Pero SEÑOR a kontest'é: ‘No tene miedu, bo no ta muri! Serka Mi bo ta haña pas.’

²⁴E ora ei Gideon a traha un altá einan pa SEÑOR i a yam'é: SEÑOR ta pas. E altá akí te awe ainda ta pará na Ofra, siudat di e desendientenan di Abiezèr.

²⁵E mes anochi ei SEÑOR a bisa Gideon: ‘Kohe un toro di bo tata, e di dos toro, esun ku tin shete aña. Tumba e altá di Baal ku bo tata tin i kap e palu sagrado di Ashera, ku tin serka dje.

²⁶Despues bo ta traha un altá pa SEÑOR bo Dios, riba e punta di mas altu di e fòrti akí. Sòru pa e ta bon trahá. Ku e di dos toro ei bo ta ofresé Mi un sakrifisio di kandela. Pa traha e kandela bo ta usa e palu sagrado ku bo a kap basha abou.’

²⁷E ora ei Gideon a bai ku dies di su sirbidónan i a hasi loke SEÑOR a mand'é. E tabatin miedu di su famia i di e hòmbernan di siudat. P'esei e no a hasié den dia, pero den anochi.

²⁸Ora e hòmbernan di e siudat a lanta mainta trempan, nan a haña e altá di Baal bashá abou i e palu sagrado di Ashera ku tabatin serka dje di kap. E toro tabata sakrifiká riba e altá nobo ku tabatin trahá einan.

²⁹Nan a bisa otro: ‘Ta ken a hasi e kos akí?’ Despues ku nan a puntra aki aya, nan a bin haña sa ku ta Gideon, yu di Yoash, a hasié.

³⁰Nan a bai serka Yoash i bis'é: ‘Trese bo yu aki! E tin ku muri, pasobra el a basha altá di Baal abou i el a kap e palu sagrado di Ashera.’

³¹Yoash a kontestá e hòmbernan ku tabata pará serka dje: ‘Boso ta bai defendé Baal i bringa p'e? Ken ku bringa pa Baal ta haña su morto promé ku mañan mainta. Si Baal ta un dios, lag'é bringa pa su mes, awor ku un hende a basha su altá abou!’

³²For di e dia ei nan a kuminsá yama Gideon, Yerubaal[3] pasobra nan a bisa: ‘Laga Baal bringa pa su mes, awor ku Gideon a basha su altá abou!’

³³Den e tempu ei tur e midianitanan, e amalekitanan i e pueblonan di oriente a uni. Nan a krusa riu Yordan i a lanta nan kampamentu den vaye di Yizreel.

³⁴Despues Spiritu di SEÑOR a yena Gideon. El a supla kachu pa e desendientenan di Abiezèr bin uni kuné i siguié.

³⁵Ademas el a manda mensahero den sobrá di e region di Manase pa bisa nan bin yuda. Pa e tribunan di Asher, di Zebulon i di Naftali tambe el a manda mensahero. Tur e tribunan akí a sali pa bai uni nan mes kuné.

³⁶Awor Gideon a bisa Dios: ‘Enberdat t'ami Bo a skohe pa salba Israel?

³⁷Awèl, SEÑOR, mi ta bai pone un pida lana di karné kaminda nos ta bati trigo. Si mainta e lana so ta muhá ku serena i e tera rònt di dje ta seku, ta sigur ku ta ami Bo a skohe pa salba Israel, manera Bo a bisa.’

³⁸I asina a sosodé. Ora Gideon a lanta mainta trempan, el a trose e lana i e serena ku a sali for di e lana a yena un kòmchi.

³⁹Gideon a bisa Dios: ‘No rabia ku mi si mi insistí, pero laga mi hasi un prueba mas ku e lana. E bia akí laga e lana so keda seku i laga serena muha tur e tera.’

⁴⁰E anochi ei Dios a hasi loke Gideon a pidi: e lana so tabata seku pero tur e tera tabata kubrí ku serena.