Read Papiamento Huesnan 7 Bible Online

Huesnan 7 - Papiamento bible

Huesnan 7

¹Yerubaal, esta Gideon, a lanta mainta trempan i ku tur e hendenan ku tabata huntu kuné el a bai lanta su kampamentu banda di bròn Harod. E kampamentu di Midian tabata keda nort di esun di Gideon, den e vaye na pia di seru Morè.

²SEÑOR a bisa Gideon: ‘Bo tin asina tantu hende serka bo, ku si Mi laga e israelitanan derotá e midianitanan, nan por duna nan mes e honor i pensa ku ta riba nan mes forsa nan a libra nan mes.

³P'esei bisa tur hende: “Esun ku tin miedu i ta tembla, por sali for di seru Guilead i bai kas numa.” ’ Asin'ei 22.000 hòmber a bai bèk i a sobra 10.000.

⁴Pero SEÑOR a bisa Gideon: ‘Ainda tin di mas. Bai ku nan pa nan bebe awa i aya Mi ta skohe den nan. E ora ei lo Mi bisa bo ken ta bai ku bo, ken no.’

⁵Gideon a bai ku su hendenan pa nan bebe awa i SEÑOR a bis'é: ‘Wak tur esnan ku ta lembe e awa manera kachó. Eseinan bo ta separá for di esnan ku ta hinka rudia pa bebe awa.’

⁶Tabatin 300 hòmber ku a pone man na nan boka i lembe e awa. Tur sobrá tabata hinka rudia pa nan bebe awa.

⁷E ora ei SEÑOR a bisa Gideon: ‘Ku e 300 hòmbernan akí Mi ta bai salba Israel i laga bo derotá e midianitanan. E otronan por bai kas numa.’

⁸Gideon a tene e 300 hòmbernan i a manda sobrá kas. Ma promé ku nan bai, Gideon i e 300 hòmbernan a tuma e kuminda i e kachunan di karné ku e otronan tabatin. E kampamentu di Midian tabata keda den e vaye, mas abou ku e kampamentu di Gideon.

⁹E anochi ei SEÑOR a duna Gideon òrdu: ‘Lanta ariba i baha bai ataká e kampamentu di e midianitanan pasobra Mi ta duna bo poder riba nan.

¹⁰Si ainda bo tin miedu di ataká, bai e kampamentu ku bo sirbidó Pura

¹¹i skucha loke nan ta bisa. Despues lo bo haña mas kurashi i ataká nan.’ Gideon a baha ku su sirbidó Pura i a yega te na rant di e kampamentu di e enemigu.

¹²E midianitanan, e amalekitanan i e pueblonan di oriente a lanta nan kampamentu i a plama den e vaye manera trupa grandi di dalakochi. No por a konta nan kamelnan; nan tabata mes tantu ku santu di laman.

¹³Ora Gideon a yega, nèt un hòmber tabata konta su amigu un soño: ‘Bo sa ku den mi soño mi a mira un pan trahá di sebada, lora drenta nos kampamentu, dal den un tènt, bash'é abou. E tènt a bòltu keda bentá ei bou.’

¹⁴Su amigu a kontest'é: ‘No por ta nada otro ku no ta e spada di e israelita Gideon, yu di Yoash. Dios a entregá nos i henter nos kampamentu den poder di Gideon.’

¹⁵Asina Gideon a tende e soño i e splikashon, el a bùig pa adorá SEÑOR. Despues el a bai e kampamentu di e israelitanan bèk i a bisa nan: ‘Lanta ariba, pasobra SEÑOR a entregá e kampamentu di Midian den nos poder.’

¹⁶E ora ei el a parti e 300 hòmbernan den tres grupo i a duna nan tur un kachu i un poron ku un flambeu aden.

¹⁷El a bisa nan: ‘Boso mester paga bon tinu i hasi presis loke mi hasi. Asina mi yega na rant di e kampamentu, boso mester hasi tur loke mi hasi.

¹⁸Ora ami i tur esnan ku ta huntu ku mi supla kachu, boso tur ku ta rondoná e kampamentu tambe mester supla kachu i grita: “Pa SEÑOR i pa Gideon!” ’

¹⁹Gideon i e shen hòmbernan ku tabata huntu kuné a yega na rant di e kampamentu meianochi, nèt ora nan a kaba di kambia warda. Nan a supla kachu i dal e poronnan ku nan tabatin den man kibra.

²⁰Asin'ei tur tres grupo a supla kachu i dal e poronnan kibra. Den man robes nan tabatin e flambeu i ku man drechi nan tabata tene e kachu pa nan supla. Nan tabata grita: ‘Guera pa SEÑOR i pa Gideon!’

²¹Tur ku tabata rondoná e kampamentu a keda para na nan lugá, pero henter e ehérsito di Midian a kuminsá kore i a hui bou di gritu.

²²Miéntras e 300 israelitanan a sigui supla kachu, SEÑOR a laga e midianitanan den henter e kampamentu ataká otro. E ehérsito a hui bai den direkshon di Serera te Bet-Hashita i te na Yordan serka di Abel-Mehola, nort di Tabat.

²³E ora ei Gideon a yama e israelitanan di e tribunan di Naftali, di Asher i di henter Manase, pa nan persiguí e midianitanan.

²⁴Gideon a manda mensahero tur kaminda den e serunan di Efraim pa duna e hòmbernan di e tribu ei òrdu pa baha bin para e midianitanan. Nan mester a okupá e lugánan kantu di riu, te na Bet-Bara, pa stroba e midianitanan krusa Yordan. Tribu di Efraim a sigui e òrdu

²⁵i asta nan a logra kapturá dos hefe di e midianitanan: Oreb i Zeeb. Nan a mata Oreb riba un piedra: piedra di Oreb, i Zeeb nan a mata den un baki di traha biña: baki di Zeeb. Tribu di Efraim a keda persiguí e midianitanan i a trese kabes di Oreb i Zeeb pa Gideon ku ya tabata na parti ost di Yordan.