Read Papiamento 2 Huan 1 Bible Online

2 Huan 1 - Papiamento bible

2 Huan 1

¹E karta akí ta di ami, e ansiano, pa e Señora skohí i pa su yunan.[1] Mi ta stima boso di bèrdè i no ami so, ma tur hende ku a siña konosé e bèrdat.

²Mi ta stima boso, pasobra e bèrdat ta biba den nos kurason i lo keda den nos pa semper.

³Dios Tata i su Yu Hesu-Kristu duna nos, ku ta hiba un bida di bèrdat i amor, su grasia, mizerikòrdia i pas.

⁴Mi a keda mashá kontentu ora mi a haña algun di bo yunan ta biba den e bèrdat, segun e mandamentu ku nos a risibí di Dios Tata.

⁵Awor mi ta pidi bo, Señora stimá, laga nos stima otro. Loke mi ta skibi boso no ta un mandamentu nobo, ma ta esun ku nos a risibí for di kuminsamentu.

⁶E amor ku mi ta papia di dje ta nifiká ku nos ta biba segun Dios su mandamentunan. E mandamentu manera boso a tende for di kuminsamentu, ta pa boso biba den amor.

⁷Mi ta papia asin'akí, pasobra hopi gañadó a plama rònt mundu; nan ta nenga ku Hesu-Kristu a bini berdaderamente komo ser humano. Esun ku ta hasi esei ta e antikristu, esta e gañadó.

⁸Paga tinu anto pa boso no pèrdè loke nos a traha p'e, ma sòru pa boso risibí boso rekompensá kompleto.

⁹Esun ku ke bai mas ayá di loke Kristu a siña, no tin Dios; pero esun ku aten'é na su siñansa, tin tantu e Tata komo e Yu.

¹⁰Ke men si un hende bini serka boso sin trese e siñansa akí, no risibié den boso kas. No kumind'é mes!

¹¹Pasobra esun ku kumindá un hende asina ta su kómplise den obra malbado.

¹²Mi tin hopi kos mas di konta boso, pero mi ta preferá di no hasié por eskrito. Sinembargo mi ta spera di bishitá boso i papia ku boso personalmente, ya nos tur su alegria por ta kompleto.

¹³Señora, e yunan di bo ruman muhé skohí ta manda kumindamentu!