Read Papiamento 3 Huan 1 Bible Online

3 Huan 1 - Papiamento bible

3 Huan 1

¹Di parti di e ansiano na kerido Gaius, ku mi ta stima di bèrdè.

²Kerido ruman, mi ta resa pa kos bai bon ku bo den tur sentido, pa bo por ta bon di salú, meskos ku bo bida spiritual ta salú.

³Pasobra mi a keda mashá kontentu, ora algun ruman a bin konta mi di bo dedikashon na e bèrdat; sí, ta bo kustumber di biba konforme bèrdat.

⁴Nada no ta hasi mi mas kontentu ku tende ku mi yunan ta biba konforme bèrdat.

⁵Kerido ruman, bo ta aktua korektamente den loke bo ta hasi pa bo rumannan, asta ora nan ta strañero.

⁶Nan a konta e rumannan akí di bo amor. Por fabor, yuda nan ku loke nan mester pa sigui nan biahe na un manera ku ta agradá Dios.

⁷Pasobra nan ta di biahe pa proklamá nòmber di Kristu, i nan no a aseptá niun yudansa di e no kreyentenan.

⁸P'esei nos tin ku sostené hende asina, pa di e manera ei nos kolaborá ku trabou di proklamá e bèrdat.

⁹Mi a skibi e rumannan, ma Diotrefe ku gusta manda, no ta rekonosé nos outoridat.

¹⁰P'esei ora mi bini, lo mi trese e asuntu akí dilanti. E ta kana hasi redu riba nos i kalumniá nos, i komo si fuera esei no ta basta, e ta nenga e rumannan ku bini hospitalidat. Anto e ta stroba esnan ku sí ke risibí e rumannan i ta saka nan for di komunidat di kreyente!

¹¹Kerido ruman, no sigui mal ehèmpel, sino sigui loke ta bon. Esun ku hasi bon ta pertenesé na Dios; esun ku hasi malu no a mira Dios nunka.

¹²Tur hende ta papia bon di Demetrio. Su bida di akuerdo ku e bèrdat ta konfirmá esei. Nos tambe ta testiguá na su fabor i bo sa ku nos testimonio ta bèrdat.

¹³Mi tin hopi kos mas di bisa bo, ma mi no ke hasié por eskrito.

¹⁴Mi ta spera di mira bo pronto i nos lo papia personalmente.

¹⁵Pas sea ku bo. E amigunan di aki banda ta manda kumindamentu. Kumindá tur nos amigunan personalmente pa nos.