Read Papiamento Revelashon 13 Bible Online

Revelashon 13 - Papiamento bible

Revelashon 13

¹Mi a mira un bestia sali for di laman. E tabatin dies kachu i shete kabes; riba kada kachu tabatin un diadema, i riba su kabesnan tabatin nòmber ku ta blasfemá Dios, skibí.

²E bestia ku mi a mira tabata parse un leopardo. Su patanan tabata manera pata di oso i su boka tabata parse boka di leon. E dragon a duna e bestia su forsa, su trono i su poder grandi.

³Un di su kabesnan tabata parse mortalmente heridá, pero e herida mortal a kura. E ora ei yen di atmirashon henter mundu a bai tras di e bestia,

⁴i nan a adorá e dragon, pasobra el a duna e bestia poder. Nan a adorá e bestia tambe i bisa: ‘Ken ta igual na e bestia? Ken por kuminsá bringa kuné?’

⁵E bestia a haña oportunidat pa papia kos di sobèrbè, pa blasfemá Dios i pa ehersé poder durante 42 luna.

⁶E ora ei e bestia a kuminsá blasfemá Dios, Dios su lugá di biba i esnan ku ta biba einan den shelu.

⁷Tambe a dun'é oportunidat pa bringa ku esnan ku ta pertenesé na Dios i derotá nan; ademas a dun'é poder riba kada tribu i pueblo, riba kada idioma i rasa.

⁸Tur habitante di mundu lo ador'é, tur ku nan nòmber no ta skibí for di kreashon di mundu den e buki di bida, buki di e Lamchi matá.

⁹Es ku tin orea, tende:

¹⁰Esnan destiná pa bai den prizòn, lo keda kohé prezu. Esnan destiná pa muri morto di spada, lo keda matá ku spada. Aki ta konta: perseveransia i fe di esnan ku ta pertenesé na Dios.

¹¹E ora ei mi a mira un otro bestia. Esaki a sali for di tera. E tabatin dos kachu manera un lamchi, i tabata papia manera un dragon.

¹²Tur poder di e promé bestia e ta ehersé den su nòmber. E ta hasi ku mundu i su habitantenan ta adorá e promé bestia, di kua e herida mortal a kura.

¹³E ta hasi señal grandi; den bista di tur hende e ta laga asta kandela baha for di shelu riba tera.

¹⁴E ta gaña e habitantenan di mundu pa medio di e señalnan ku e ta hasi den nòmber di e bestia. E ta kalanchá e hendenan pa nan lanta un imágen na honor di e bestia ku a keda heridá pa medio di spada, pero ku a keda na bida.

¹⁵E di dos bestia a haña poder pa supla rosea di bida den e imágen akí, di manera ku e por a papia i mata tur hende ku no ker a adorá e imágen.

¹⁶E ta sòru pa tur hende, grandi i chikitu, pober i riku, katibu i liber, haña un señal riba nan man drechi òf riba nan frenta;

¹⁷ningun hende ku no por kumpra ni bende nada si e no ta karga e señal ei, esta nòmber di e bestia òf number di su nòmber.

¹⁸Aki ta sabiduria ta konta. Esun ku ta inteligente, por kalkulá kiko number di e bestia ta nifiká, pasobra ta number di un hende. Su number ta 666.