Read Papiamento Revelashon 21 Bible Online

Revelashon 21 - Papiamento bible

Revelashon 21

¹E ora ei mi a mira un shelu nobo i un tera nobo; e promé shelu i e promé tera a disparsé i laman no tabata eksistí mas.

²I mi a mira e siudat santu, e Herusalèm nobo, baha bini for di shelu for di serka Dios. E siudat tabata kla pará manera un brùit ku a drecha su kurpa pa su esposo.

³For di direkshon di e trono mi a tende un stèm duru bisa: ‘Esaki ta e lugá di biba di Dios serka hende. Lo E biba serka nan i nan lo ta su pueblo.[11], E mes lo ta serka nan komo nan Dios.

⁴Lo E seka tur lágrima for di nan wowo, i morto lo no eksistí mas: lo no tin nada di rou, nada di yoramentu, nada di doló mas, pasobra tur kos di ántes a pasa bai.’

⁵Esun sintá riba trono, a bisa: ‘Tende, Mi ta hasi tur kos nobo.’ Despues El a bisa: ‘Skibi e kos akí, pasobra e palabranan akí ta fidedigno i konfiabel.’

⁶Despues El a bisa mi: ‘Nan a keda kumplí! Mi ta Alfa i Omega, orígen i fin. Es ku tin set lo Mi duna di bebe pòrnada for di e fuente di awa ku ta duna bida.

⁷Es ku triunfá lo haña tur e kosnan akí, i lo Mi ta su Dios i e mi yu.

⁸Pero destino di e kobardenan, infielnan, perversonan, asesinonan, paranderonan, hasidónan di bruha, sirbidónan di dios falsu i tur gañadó, ta den e lago di kandela i suafel ku ta kima. Esaki ta di dos morto.’

⁹Un di e shete angelnan ku tabatin e shete skalchinan yená ku e shete delaster plaganan, a bin bisa mi: ‘Bini, mi ta bai mustra bo e brùit, esposa di e Lamchi.’

¹⁰Pa medio di Spiritu di Dios el a hiba mi riba un seru grandi i altu i a mustra mi e siudat santu, Herusalèm, miéntras, e siudat tabata baha for di shelu for di serka Dios,

¹¹briando di Dios su gloria: e tabata lombra manera e piedra di mas presioso, transparente manera kristal.

¹²Rondó di e siudat tabatin un muraya grandi i altu ku diesdos porta. Na kada porta tabatin un angel pará. Riba e portanan tabatin nòmber di e diesdos tribunan di Israel skibí.

¹³Tabatin tres porta na banda ost, tres na banda nort, tres na banda zùit i tres na banda wèst.

¹⁴Muraya di e siudat tabata riba diesdos piedra di fundeshi grandi, riba kua nòmber di e diesdos apòstelnan di e Lamchi tabata skibí.

¹⁵Esun ku tabata papia ku mi, tabatin un dùimstòk pa midi e siudat i su portanan i su muraya.

¹⁶E siudat tabata forma un firkant: e tabata mes largu ku hanchu. Ora e angel a midi largura di e siudat, el a yega na mas o ménos 12.000 midí;[12] largura, hanchura i altura di e siudat a resultá mes grandi.

¹⁷Muraya di e siudat tabata 144 midí chikí[13] altu, midí segun nos midínan, ku e angel tambe a usa.

¹⁸E muraya tabata trahá di yaspes, e siudat mes tabata di oro puru transparente manera glas.

¹⁹E piedranan di fundeshi di e muraya di siudat tabata trahá di tur sorto di piedra presioso. Esun promé tabata di yaspes, di dos di safiro, di tres di ágata, di kuater di esmeralda,

²⁰di sinku di óniks, di seis di rubí, di shete di turkesa, di ocho di akuamarina, di nuebe di topas, di dies di krisopras, di diesun di yasinto, di diesdos di amatista.

²¹E diesdos portanan tabata diesdos pèrla: kada porta tabata konsistí di un solo pèrla. E kayanan di siudat tabata di oro puru, transparente manera glas.

²²Den e siudat mi no a mira un tèmpel, pasobra Señor Dios, Esun Todopoderoso, i e Lamchi ta su tèmpel.

²³E siudat no tin mester di lus di solo, ni di luna, pasobra splendor di Dios ta ilumin'é i e Lamchi ta su lampi.

²⁴E nashonnan lo biba den e lus ku ta sali for di e siudat i e reinan di mundu lo trese nan rikesanan ayanan.

²⁵E portanan di e siudat lo ta habrí henter dia i lo no sera nan mas, pasobra lo no tin anochi mas.

²⁶Lo hiba luho i rikesa di e nashonnan ayanan.

²⁷Pero nada ku ta impuru, lo no drenta e siudat, ni esnan ku ta hasi kos repugnante òf saka mentira. Solamente esnan ku ta notá den e buki di bida, buki di e Lamchi, ta drenta.